Зи суьгьбет дуьньядиз машгьур оперный манияр тамамардай чIехи артист Д.Хворостовскийдикай я. Ам Аллагьдин патай пай ганвай хьтинди тир. Буйдиз кьакьан, гуьрчег кIалубрин, рикIи чIугвадай акунар алайди. Лугьудайвал, уьмуьрдин са пайни тахьанмаз, гайиди хьиз, Аллагьди вахчунни авуна. Рекьидайла, адан 55 йисни хьанвачир. Кьилин мефтIедик рак азар акатнавай. Фалужди янавай са гъил бедендал кутIунна, манияр лугьун акъвазардачир касди…

2018-йисан 23-августдиз Москвадин ЦТ-дай “Пусть говорят” нубатдин передача тухвана. Аниз рагьметлу Д.Хворостовскийдин паб кьве аялни галаз атанвай. Флоранса тIвар алай испанка гьа гъуьл хьтин чIехи алакьунар авай артистка тир. Гьавиляй сад-садал ашукьни хьана, эвленмишни. Уьмуьрдин юлдаш гьакъи­къатда жуван кьвед лагьай жув хьун вири­далайни чIехи бахт я. Жегьилри чеб гьакI кьабулни авунай.

Аламатдин са кар акунай студиядиз атанвай ксариз – дидени аялар регьятдиз урус чIалал рахазвай. Кар алайди ам тир хьи, урус артистдиз гъуьлуьз атайла, Фло­­рансадиз са гафни урусдал рахаз чидачир. Вичивай хабар кьурла, ада гайи жавабди залда авай кьванбур вири мягьтеларнавай. Рахазвайдан чIалан устадвили абурун гьейранвилихъ сергьят тунвачир. И кар кьатIай  Флорансади давамарна:

— Зун Димадиз, адал кIевелай ашукь хьана, ам кьадарсуз кIан хьайивиляй атайди я. Зун адан уьмуьр патал чанни гуз гьа­зур тир, гьакьван кIандай. Зун хайи ди­дед чIала инсандин психикадиз, руьгьдиз гьихьтин зурба таъсир ийизватIа, гъавурда авай. Вични инсан жуван хайибурувай яргъа авайла. Гьавиляй за сифтени-сифте жуван кIанидахъ галаз адан хайи чIа­лал рахун кьетIна. И кар алакьдайдахъ зун агъанвай. Эвела за жуваз, ахпани ­Ди­мадиз вичиз успатна зун гъалиб хьайи­ди. Эхь, гьуьрметлубур, халис муьгьуьб­батдихъ ихьтин алакьунарни авайди заз акуна.

Зунни аялар Димадихъ галаз дуьз урус чIалал рахайла, кьакьан буйдин Ди­ма мадни кьакьан хьайиди аквазвай. Ам акI авай хьи, гъил хкажайтIа, цаваривни агакьдай. Квезни вирибуруз аквазва — залай хиве кьурвал алакьни авурди…­

Студияда авай вирибуру адаз капар янай.

Россиядиз Флоранса, гъуьлуькай магьрум хьана йисни зур алатайла, атанвай. Ада рагьметлу Хворостовскийдин руьхъ адан ватан Красноярскдин накьварик  фаракъатун патал хканвай. А вахтунда Флорансади гъуьлуьн ватанда вичихъ галаз теклифнавай артистрин куьмекдалди концертни ганай. Къазанмишай пулдин такьатар вири азарлу аялриз куьмек патал харжнай.

Флорансади, рахадайла, рагьметлу Хворостовскийдин гафарни рикIел хканай: “Чан аламай кьван чалай вири алакьда”.

Вичин рахунар ада ихьтин гафаралди куьтягьнай: “Дима захъ галамай кьван вахтунда заз къулай тир, са куьнихъай­ни кичIевал авачир, ам зи далудихъ дагъ хьиз галай”.

Азедин  Эсетов