СтIал Сулейманан районда коронавирусдик, стIалжемдик начагъбурун кьадар тIимил жезва. Идакай саласа юкъуз муниципалитетдин администрацияда Нариман Абдулмуталибован регьбервилик кваз кьиле фейи заседанидал райондин больницадин кьилин духтур Жафер Къурбанисмаилова хабар гана.
Адан гафаралди, начагъбурун кьадар тIимил жез гатIуннава, амма тIегъуьндихъ галаз алакъалу гьалар, санлай къачурла, къайдадик ахкатнавач. Районда, духтурриз хабар тагуз, чеб кIвалин шартIара сагъар хъийизвайбурни ава.
Алай вахтунда райондин кьилин больницадин инфекцийрин отделенидин махсус блокда 8 кас сагъар хъийизва. Абурукай кьуд коронавирус акатнавайбур я. Эхиримжи гьафтеда районда коронавирус акатнавай 3 дуьшуьш малум я.
Жафер Къурбанисмаилова къейд авурвал, исятда духтуррин гуьзчивилик кваз кIвалин шартIара сагъар хъийизвайбурун кьадар 153-дав агакьнава. Абурун арада гьам коронавирусдик, гьамни стIалжемдик начагъбур ава.
ТIегъуьндиз акси рапар ягъуникай суьгьбетдайла, кьилин духтурди хабар гайивал, эхиримжи гьафтеда 95 агьалиди рапар янава. Санлай къачурла, ихьтинбурун кьадар 4439-дав агакьнава.
Къейд ийин хьи, духтурри, хуьрериз, кIвалериз физ, коронавирусдиз акси рапар ягъун давамарзава. Мукьвара райондин кьилин больницадин бригадаяр рапар ягъун патал Курхуьруьзни Уллу-Гъетягъиз фенвай.
«Лезги газет»
