Ислен йикъан йифиз Хасавюрт шегьерда бедбахтвилин дуьшуьш арадал атана: мугьманханадин кьве гьавадикай ибарат дараматди цIай кьуна. “Лезги газетдиз” Дагъустандин МЧС-дин Кьилин Управленидин пресс-къуллугъди хабар гайивал, нетижада кьве кас телеф хьана, ругуд кас Хасавюртдин духтурханадиз агакьарна.
Республикадин здравоохраненидин министерстводин пресс-къуллугъди хабар гузвайвал, сагъламвилиз хасаратвилер хьанвай ругудакай кьве кас ислен юкъуз вертолетда аваз Махачкъаладиз, РКБ-диз гъана.
ЦIай кьунин себеб вуч ятIа гьелелиг тайинарнавач. И кардал алай вахтунда пешекарар машгъул жезва. Кьилди къачуртIа, агьвалатдин шагьидар хьайибурувай хабарар кьазва, дараматда цIаяр кьуниз рехъ тагун патал кьабулнавай серенжемриз къимет гузва, экспертизаяр кьиле тухузва.
РФ-дин Силисдин комитетдин РД-да авай Управлениди арадал атанвай дуьшуьшдин гьакъиндай, РФ-дин Уголовный кодексдин 238 статьядин 3-паюнал асаслу яз, уголовный дело къарагъарнава. Къейд ийин хьи, и кар уьлкведин Силисдин комитетдин кьил Александр Бастрыкина хсуси гуьзчивилик кутунва.
«Лезги газет»
