И мукьвара Белоруссиядин меркез Минск шегьерда 3 сеферда Олимпиададин чемпион А.Медведан призар патал азаддаказ кьуршахар кьунай кьиле фейи международный Гран-Придин 50 — турнирда дуьньядин 9 уьлкведин, гьа гьисабдай яз Россиядин, Гуржистандин, Къазахстандин, Узбекистандин спортсменри иштиракна. Россиядин хкянавай командадик квай чи машгьур спортсмен Рамазан Ферзалиева 65 кг-дал къведалди заланвал авайбурун арада 1-чка кьуна.
Турнирдин финалдиз акъатдалди, Р.Ферзалиеваз Белоруссиядин векилар тир В.Койка (10:0) ва Н.Скрябин (9:5 ) кумукьна. Ярумчух финалда Гуржистандай тир Бека Ломтадзеди, кIвачиз тIарвал хьанвайвиляй, духтуррин меслятдалди, бягьс давамарнач. Финалдин бягьсина чи ватандашдиз Ирандай тир Пейман Али Нематидихъ галаз къуватар ахтармишун кьисмет хьана. Бягьс 8:8 гьисабдалди акьалтIна, амма судьяйри, гьасиррал къалурай устадвал ва бягьсерин ерилувал фикирда кьуналди, Р.Ферзалиев гъалиб хьайиди малумарна.
РикIел хкин: чи ватандашдихъ спортдин рекье агалкьунар идалай виликни хьана. ИкI, Р.Ферзалиева Ярыгинан международный турнирда гъалибвал къазанмишна, адакай кьве сеферда Россиядин чемпионатдин, Умаханован турнирдин гъалибчини хьана.
Чна умудзава, къведай вацра Норвегиядин Осло шегьерда кьуршахар кьунай кьиле фидай дуьньядин чемпионатда иштиракдайбурук Р.Ферзалиевни акатда.
***
Са тIимил йикъар идалай вилик Сербиядин Младеновац шегьерда грекринни римлуйрин жуьреда кьуршахар кьунай международный турнир акьалтIна.
Россиядин спортсменар патал и акъажунрихъ кьетIен метлеб ава: адан нетижайрал асаслу яз, алай йисан октябрдин сифте кьилера Норвегиядин Осло шегьерда кьиле фидай дуьньядин чемпионатда иштиракдай команда туькIуьрда. Гьаниз килигна, кесерлу и акъажунра Россиядин чIехиди тир командади иштиракна, спортсменри хъсан нетижаярни къазанмишна. Абурун арада чи ватандаш Анвар Аллагьяровни авай. ИкI, турнирда 60 кг-дал къведалди заланвал авай спортсменрин арада ам гимишдин медалдиз лайихлу хьана. Адаз дуьньядин чемпионатда вичин устадвал къалурдай мумкинвал ава. ГьикI хьи, гимишдин медалар къазанмишай спортсменарни Россиядин хкянавай командадик акатун мумкин я. Амма гьелелиг команда арадал гъанвач.
РикIел хкин: А.Аллагьяров 2000-йисуз Ахцегьа дидедиз хьана. Алай йисан майдиз ада Европадин чемпионвилин тIвар къазанмишна. Ам жегьилрин арада Россиядин ва дуьньядин чемпионвилин тIварарин сагьибни я.
Рагнеда Рамалданова
