РикIел хкин, са кьадар вахт идалай вилик, июлдин вацра, республикадин метлеб авай “Мегьарамдхуьр-Усугъчай-Ахцегь-Рутул” шегьре рехъ цIийикIа туьхкIуьр хъувунив эгечIнавайдакай хабар ганай. Разивилелди лугьун, “Улакьрин хатасуз ва ери авай рекьер” программадин сергьятра аваз “Фериде” ООО-ди Докъузпара, Ахцегь районрин сергьятра 21 километрдин мензилда кьиле тухузвай кIвалахрин саки са пай бегьемарна, ингье рекье къир цаз эгечIнава.
Къейд ийин, Самур дередин кьуд районда хуьруьн майишатдин производство артмишун, чкадин агьалийрин яшайишдинни экономикадин месэлаяр гьялун, туризмдин бизнесдин мумкинвилер ачухун, гьакI уьлкведин кьиблепатан сергьятдин дагълух заставайрихъ галаз умудлу алакъа хуьн патал и шегьредихъ еке метлеб ава. Гьавиляй эхиримжи вахтунда Дагъустандин руководстводи и месэладиз артух дикъет гузва.
10-сентябрдиз Ахцегь райондин кьил Осман Абдулкеримов ва депутатрин собранидин председатель Абдулкерим Палчаев и шегьре рекьин Ахцегьрин мулкарилай физвай участок цIийикIа туьхкIуьр хъийизвай чкадал фена, устIаррин гуьгьуьл къачуна, РД-дин “Дагавтодор” ГКУ-дин руководитель Ханмегьамед Рагьимовахъни пудратчи кархана тир “Фериде” ООО-дин векилрихъ галаз рахана. КIвалахрин еридилай абур рази яз амукьна.
“И рехъ гъиляй вегьена къад йисалайни гзаф тир, гьавиляй жемятдин патай гьахълу наразивилерни авай. Разивилелди лугьун, рехъ туькIуьр хъувунин мураддалди гьукумдин жуьреба-жуьре къурулушриз ракъурай чи чарар-цIарар, авур кьван алахъунар, Аллагьдиз шукур, бада фенач. Нетижада цIи чна республикадин ва райондин къенепатан хейлин рекьера къир цанва. Гила районэгьлийриз анра къекъуьн, улакьар гьалун са лезет я. Анжах са шартI ава: рекьер чна жуван хсусибур хьиз хвена, яд тван тийиз алахъна, куьрелди, къайгъударвална кIанда. Районэгьлийриз яшайишдин къулайвилер, рекьерин хатасузвал таъминарун патал рекьер туькIуьр хъувунин кIвалах чна къведай йисузни давамарда”, — къейдна О.Абдулкеримова.
Дашдемир Шерифалиев
