Алатай гьафтеда РФ-дин хуьруьн майишатдин министрдин заместитель Оксана Лутан регьбервилик кваз интернетдин алакъадин куьмекдалди государстводин “Хуьруьн мулкар комплекснидаказ вилик тухун” программадиз талукь месэлаяр веревирдна. Ана РД-дин хуьруьн майишатдин ва суьрсетдин министерстводин векилрихъ галаз санал Ахцегь ва СтIал Сулейманан районрин кьилерини — Осман Абдулкеримовани Нариман Абдулмуталибова — иштиракна.
Мярекатдилай кьулухъ Ахцегь райондин кьили совещанидин ва адан сергьятра аваз веревирд авур месэлайрин гьакъиндай вичин фикирар лагьана.
“Теплицайрин ва фермервилин майишатар, недай-хъвадай промышленность вилик финин нетижада ихтилат физвай федеральный программада иштиракзавай республикадин кьве райондикай сад Ахцегь район я.
Алай вахтунда кьилиз акъудзавай ва гуьгъуьнин йисарани тамамариз эгечIдай хуьруьн майишатдин ва промышленностдин хилериз талукь инвестицийрин проектри (майваярни емишар хуьдай чкаяр, фермаяр, сар гьялдай цех ва мсб.) программада иштиракун патал кьиле тухвай конкурсда гъалиб жедай мумкинвал гана.
Чун сифте нубатда чкадал хуьруьн майишатдин суьрсет гьасилзавай лежберриз ам маса гудай къулай шартIар тешкилиз алахъзава. Мумкинвиликай менфят къачуна, заз райондин вири лежберриз, КФХ-рин, СПК-рин векилриз, карчийриз абурун зегьметдай сагърай лугьуз кIанзава.
РикIел хкин, ихтилат физвай проект кьилиз акъудунин сергьятра аваз Ахцегь райондив тади куьмекдин 2 улакь, мектебриз аялар тухудай цIийи 2 автобус, мобильный ФАП агакьна. Гьа и программадин куьмекдалди Ахцегьа 60 чка авай аялрин бахча, спортдин комплекс, кIелдай 120 чка авай мектеб эцигзава. Къведай йисуз “Мацар-Смугъул” цин провод тухунив гатIундайвал я”, — лагьана О.Абдулкеримова.
«Лезги газет»
