Чи ватанэгьлияр — гьар сана

Сагълам уьмуьр кьиле ­тухунин, спортдал машгъул хьунин кардал жегьилар желб­­завай ватанэгьлийрикай сад Москвада яшамиш жезвай спортсмен, тренер, кака­хьай­ женгерин “Леки” клубдин тешкилатчи, спортдин мастер Эльмар  Телманович  Гьажиагьмедов  я. 

Заз чир хьайивал, тренервилин рекьяй вад йисан тежриба хьанвай пешекардин регьбервилик кваз спортдал машгъул жезвай хейлин же­гьилрихъ хъсан агалкьунар хьан­ва, жезва. “Леки” сифте нубатда лезгийрин спортдин макан я.

Эльмар Гьажиагьмедов 1994-йисан 18-апрелдиз дидедиз хьана. Ам Хив райондин ЦIийи Фригърин хуьряй я. “Леки” тIвар алай спортдин клуб ада 2019-йисуз Москвада арадал гъана ва ана алай вахтундани кьилин тренервиле кIвалахни ийизва.

Э.Гьажиагьмедова 3-4-классра кIелзавай чIавалай спортдиз ма­йилвал къалурна. Сифтедай дзюдодални самбодал машгъул тир, Да­гъустандин чемпионатдин призер хьана. КIелиз Москвадиз фейидалай кьулухъ ана А.Харлампиеван тIварунихъ галай женгинин самбодин мектебдик экечIна. Женгинин самбодай Москвадин чемпионатда гъалибвал къачуна, спортдин и жуьредай мастервилин тIвар­цIизни лайихлу хьана. Гуьгъуьнлай грэпп­лингдал, какахьай женгерал элячI­на, пешекаррин акъажунра агал­кьун­ралди иштиракна.

Четинвилеризни килиг тавуна, вилик эцигай макьсадар кьилиз акъудунин алахъунар ийизвайвиляй адан нетижаярни разивализ жедайбур хьанва.

“Леки” клуб арадал атуникай, адан кIвалахдикай, вилик акъвазнавай месэлайрикай хабар кьурла, Эльмара заз ихтилатна: “Чна, лезгийри, жуван ватанэгьлияр спортдал желбунин мураддалди “Леки” тIвар алай клуб арадал гъана, и тIвар­­ни заз дустарикай сада теклифна. Асул гьисабдай клубда ММА-дай вердишарзава. Жегьилар гзаф къвезва, чIехи пай лезгияр я, тажикарни, узбекарни, урусарни ава. Исятда чун цIийи зал кирида кьунин къайгъуйрик ква. “Леки” клуб арадал гъана са йис алатайдалай кьулухъ чун нетижаяр ахтармишун патал имтигьанра — акъа­жунра иштиракунив эгечI­на. Дамахдивди къейд ийиз жеда, клубда какахьай женгерай вердишвилер къачур спортсменрин иштираквал аваз, пешекарвилин ММА-дай 14 бягьс тешкилна. Абурукай 12 бягьсина “Ле­кидин” пагьливанри гъалибвал къачуна. Нетижайри рази авур ватанэгьлийрин гьевес мадни хкаж хьана”.

Малум хьайивал, исятда вич бегьлеяр алачиз гъутаралди кикIиз­вай бягьсера маш­гьур хьанвай лезги пагьливан Давуд Кельбиханова какахьай женгерай Эльмар Гьажиагьмедован регьбервилик квай вахтунда кьиле тухвай пуд бягь­синан­и гъалибвал къазанмишна. Гьа ихьтин агалкьунар адан регьбервилик кваз боксдал машгъул хьайи Расим Гьажиалиевахъни хьана. “Лекида” чпин устадвал хкажай хей­линбуру чеб викIегь спортсменар тирди гегьенш майданра агалкьунар къазанмишуналди успатнава.

Эльмарахъ галаз авур ихтилатрай за кьатIайвал, мумкинвилер гегьеншарун ва тренерар патал пулдин жигьетдай куьмекар герек жезва, амма къаюмвалдайбур майдандиз экъечIзавач.  Клубда алай вахтунда тренервилин кIвалах анжах вичи давамарзава. Гележегда Э.Гьажиагьмедоваз цIийи залда мумкинвилер мадни гегьеншардай, лезгийрикай цIийи тренерар желбдай фикирар ава. Къуй адан рикIин мурадар кьилиз акъатрай!

К.Ферзалиев