Алатай гьафтеда СтIал Сулейманан райондин яшайишдин уьмуьрда лишанлу вакъиа кьиле фена: Ичинрин ва Вини Хъартасрин хуьрерив газ агакьна. Муниципалитетдин администрациядин пресс-къуллугъди хабар гайивал, и кардиз талукь яз тешкилай мярекатра РД-дин Гьукуматдин Председателдин Сад лагьай заместитель Батыр Эмеева, РД-дин хуьруьн майишатдин ва суьрсетдин министр Баттал Батталова, райондин кьил Нариман Абдулмуталибова ва масабуру иштиракна.
Н.Абдулмуталибован гафарай малум хьайивал, Ичинрин хуьр государстводин программадин сергьятра аваз газдалди таъминарнава. Программадин шартIарикай сад ам тир хьи, кIвалахриз акъатзавай харжарин тайин са пай инвесторри чпин хивез къачуна кIанзавай. Майдандиз гьахьтин кьегьаларни акъатна. Амма 2016-йисуз гъиле кьур кIвалахар бес кьадар такьатар тахьуникди акъваз хьана. 2020-йисуз “Хуьрерин мулкар комплекснидаказ вилик тухун” программадин сергьятра аваз кIвалахрал чан хкана. И программада иштиракун патални инвестор герек хьана. Адан везифаярни Ичинрин хуьр газдалди таъминаруниз акъатзавай пулдин такьатрин тайин са пай “Полоса” агрохолдингдин “СтIалрин багълар” проект килиз акъудзавай инвесторди вичин хивез къачуна. Къейд ийин хьи, и программадин сергьятра аваз мукьвал тир девирда КIахцугърин хуьр ва Эминхуьруьн цIийи микрорайон газдалди таъминарда.
Вини Хъартасрин хуьре кIвалахар эвелдай тайин макьсаддихъ элкъуьрнавай федеральный программадин сергьятра аваз кьиле тухузвай. Амма инани, Ичинрин хуьре хьиз, пулдин такьатрин кьитвиляй кIвалахар вахтуналди акъвазаруниз мажбур хьана. Райондин кьилевайбуру ва хуьруьн агьалийри са шумуд сеферда республикадин министерствойриз чарар-цIарар кхьейдалай кьулухъ кIвалахрив эгечI хъувунай.
«Лезги газет»
