И мукьвара чаз вичихъ еке гележег авайбурукай сад яз гьисабзавай, гъвечIи чIавалай каратэдал рикIивай машгъул жезвай кьегьал хва Агьмед Агьмедовахъ галаз суьгьбетдай мумкинвал хьана. 2003-йисуз дидедиз хьайи Агьмед Агьмедован (шикилда вичин бубадихъ галаз) ери-бине Ахцегь райондай я. Ам хизандихъ галаз Саратов шегьерда яшамиш жезва. ЦIи жегьил Саратовдин госуниверситетдиз гьахьнава. Ада вичин буба Ихтибар Агьмедован гъилик вердишвилер къачузва.
Авайвал хиве кьуртIа, заз чи миллетдин векилрикай каратэдал машгъул жегьилар тIимил чида. Белки, спортдин и жуьре виликдай Олимпиададин къугъунрик квачирвиляй ам са артух виле аквазвачир жеди. Каратэ спортдин виридалайни важиблу къугъунрик кутунин жигьетдай гзаф гьуьжетар хьайиди, эхирни, мукьвара кьиле фейи Олимпиададик ам сифте сефер яз кутурди рикIел хкиз кIанзава. Умудлу я, спортдин и жуьредайни чпин устадвал къалурдай кьегьалар чахъ жеда. А умудлувал чи къенин макъаладин игитди къазанмишнавай агалкьунри мадни артухарзава.
Алатай вацран эхирра Новосибирск шегьерда каратэдай итимрин арада кьиле фейи Россиядин чемпионатда чи ватандашдини иштиракна. Ада гимишдин медаль къазанмишна. Августдиз Финляндиядин Тампере шегьерда жаванрин арада кьиле фейи Европадин кIвенкIвечивилени ам 2-чкадиз лайихлу хьана. А.Агьмедовак еке умудар кутунин амай себебрикайни лугьун кутугнава. Яшарай аквазвайвал, адан анжах 17 йис я. Амма адалай дуьньядин кесерлу хейлин маса майданрани вичикай хабар гуз алакьнава. Сифте нубатда заз Агьмед Агьмедов 15 йиса аваз, гьам яшарин, гьам заланвилин категорийрал гьалтайла, каратэдай Виридуьньядин федерациядин рейтингда 1-чкадал акъатайдакай хабар гуз кIанзава. Адал къведалди ихьтин агалкьун Россиядай тир мад са каратистдихъни хьанач.
А.Агьмедов каратэдай спортдин мастер я. 2019-йисуз ам Европадин чемпионвилин тIварцIиз лайихлу хьана. 2020-йисуз ада Европадин чемпионатда буьруьнждин медаль къазанмишна. Ам 6 сеферда Россиядин чемпион ва гимишдин призёр, хейлин международный турниррин ва Вирироссиядин акъажунрин гъалибчи ва призерни я. Аферин, галатун тийижиз, зегьмет чIугвазвай хцизни, ам вердишарзавай бубадизни! Къуй чпихъ мадни еке агалкьунар хьурай!
Рагнеда Рамалданова
