Эхиримжи йисара Дагъустанда ципицIлухрин майданар гегьенш жезва. ЦIийи ципицIлухар виридалайни гзаф республикадин кьиблепата — Дербент, Табасаран, СтIал Сулейманан, Мегьарамдхуьруьн районра — кутазва. И карди кIвалахдай алава чкаярни гзаф хьуниз таъсирзава. 2022-йисан эхирдалди Дагъларин уьлкведа ципицIлухра кIвалахдай 1 агъзурни 500 чка арадал гъидайвал я. Идакай журналистриз “Дзив-2” карханадин директор Загьид Садикьова хабар гана.
Адан гафаралди, къведай йисан эхирдалди карханади 1 агъзур гектар майданра ципицIрин технический сортар кутадайвал я. Тек са “Дзив-2” майишатди къенин юкъуз ципицIар кIватI хъувунин кIвалахрал 1 агъзурни 300 кас желбзава. З.Садикьова къейд авурвал, ада регьбервал гузвай карханади республикадин жуьреба-жуьре пипIера 2,1 агъзур гектарда ракъинин кагьрабаяр гьасилзава.
“Чи фикирдик, гьич тахьайтIа, 50 гектарда ципицIрин столовый сортар цун ва абур хуьдай хсуси чка (дарамат) эцигун ква. И кар кьилиз акъудиз алакьайтIа, чавай алишверишдин хел датIана ципицIралди таъминариз жеда”, — лугьузва З.Садикьова.
РикIел хкин, 2020-йисуз Дагъустанда 205 агъзур тонндив агакьна ракъинин кагьрабаяр кIватI хъувуна. Алай йисан делилралди, республикада, санлай къачурла, ципицIлухри 26,3 агъзур гектар кьунва, абурукай 21,2 агъзур гектарди бегьер гузва.
«Лезги газет»
