Къадим Дербент шегьерда 2022-йисуз цIилиникай рехъ туькIуьрунив эгечIда. Идакай ТАСС-диз чкадин администрациядин кьилин заместитель Артур Гьамзатова хабар гана.
Адан гафаралди, цIилинин рекьи гьуьлуьн кьер Нарын-къеледихъ галаз ала-къалу ийида. Алай вахтунда проектдин кIвалахар кьиле тухузва. Рекьин асул пай Пушкинан тIварунихъ галай куьчедай тухуда. Къейд ийин хьи, и куьчени цIийикIа туьхкIуьрдайвал я.
“Проектдин жигьетдай чна тухузвай кIвалахрин гьакъиндай республикадин ва ЮНЕСКО-дин са жерге органриз хабар ганва. Къведай йисуз цIилинин рехъ туькIуьрунив гатIундайвал я. Адан яргъивили 3,5 км тешкилда. ЦIилинин рекьин куьмекдалди шегьерэгьлийривай ва иниз къвезвай мугьманривай 15 декьикьадин къене гьуьлуьн къерехдивай Нарын-къеледал физ жеда”, — къейдна А.Гьамзатова.
«Лезги газет»
