8-сентябрдиз, 90 йисан яшда аваз, лезгийрин машгьур писатель, ДАССР-дин лайихлу муаллим, “Лезги газетдин” вафалу дустарикай ва мухбиррикай сад хьайи Назир Ширинбегович Мирзоев рагьметдиз фена. Чна адахъ яс чIугвазва, хизанриз, мукьва-кьилийриз сабурар гузва.
Н.Ш.Мирзоев 1931-йисан 1-июлдиз Ахцегь райондин Смугъулрин хуьре дидедиз хьана. Ахцегьрин юкьван мектеб, Дагъустандин ва Осетиядин педагогвилин институтар акьалтIарна, ада яргъал йисара хайи хуьре биологиядин муаллимвиле, школадин завучвиле кIвалахна. Педагогвилин гьунарлу зегьметдай адаз “ДАССР-дин лайихлу муаллим” лагьай гьуьрметдин тIвар, “Знак Почета” орден ва гзаф маса шабагьар гана.
Писатель яз, адан гъиликай гьикаяйринни повестрин “Цуькверин ваза”, “Къизилдин хтар”, “Чухвай рикI”, “Цацар алай цуьк”, “Уьмуьр эбеди я”, “Ватандиз хъша”, “Кисай муьгьуьббат” ва маса ктабар хкатна. Абур чи мектебра, колледжра, вузра кIелзава. Хейлин эсерар чи учебникрани хрестоматийра гьатнава.
Н.Мирзоев Ахцегь районда ва вири Дагъустанда кьиле фейи эдебиятдинни медениятдин чIехи метлеб авай вири мярекатрин иштиракчи, гьакъикъи насигьатчи, тербиячи тир.
Писателдин ва педагог-насигьатчидин рикIик хъийидай мадни гзаф крар квай. Гьайиф, залум ажалди а мумкинвал ганач.
Писателдин, муаллимдин, мухбирдин, тербиячидин ирс несилрив гума.
Чна рагьметлудан хизанриз, мукьва-кьилийриз, вири смугъулвийриз башсагълугъвал гузва. Назир Ширинбеговичан экуь къамат чи рикIелай садрани алатдач.
“Лезги газетдин” редакциядин коллектив
