И йикъара чав пашман хабар агакьна. Яргъалди чIугур залан азардикди тIвар-ван авай муаллим-методист, бажарагълу мухбир, хайи чIалан хазинадай кесерлу, метлеблу ибарайрин кIватIалар гьазурай ва чапдай акъудай фольклорист, “Лезги газетдин” вафалу дустарикай сад Ишреф Примович Жаватов рагьметдиз фена.
И.П.Жаватов 1939-йисуз Докъузпара райондин Къалажухрин хуьре муаллимдин чIехи хизанда дидедиз хьана. Миграгърин юкьван школа (1957-йис), ДГУ-дин филологиядин факультет (1962-йис) акьалтIарайдалай кьулухъ ада вичин вири уьмуьр хайи хуьруьхъ галаз алакъалу авуна, акьалтзавай несилриз дидед чIалай ва литературадай дерин чирвилер, ахлакьдин дуьзгуьн тербия гана. Гьа са вахтунда вири йисара ам чи мухбирни, чIаланни тербиядин, эдебиятдинни тарихдин месэлайрай метлеблу макъалаяр, веревирдер кхьей, халкьдин кесерлу, камаллу келимаяр кIватIай фольклористни тир. И.Жаватован гъиликай “Лезгийрин камаллу гафар”, “Къалажух хуьруьн тарих” ктабар, цIудралди очеркарни макъалаяр хкатна.
Ада студент тир йисара Къазахстандин хам чилер къарагъарунин карда иштиракна.
Хейлин йисара, халкьди еке ихтибар авуналди, ам хуьруьн администрациядин кьилиз хкяна. Школада адакай сифтедай завуч, ахпа анин директор хьана. Адан кIвалахдин агалкьунар “РД-дин лайихлу муаллим”, “РФ-дин умуми образованидин гьуьрметлу къуллугъчи” тIварар, “Зегьметдин ветеран” медаль ва маса шабагьар гуналди къейдна. Мухбирвилин агалкьунрай ва хайи чIал хуьнин, машгьур авунин карда лайихлувилерай И.Жаватоваз “Лезги газетдин” редакциядин патай чи машгьур алим-лингвист Мегьамед Гьажиеван тIварунихъ галай премия гана. Ам РФ-дин журналистрин Союздин член тир.
ЧIехи хизандин кьил Ишреф Примовичан рикIик хъийидай гзаф крар кумай. Амма ажалдиз мажал чидач. Чав хабар агакьайвал, кьве йикъалай И. Жаватован кайванини кечмиш хьана.
Чна рагьметлуйрин хизанриз, багърийриз, мукьва-кьилийриз, вири къалажухвийриз, дериндай хажалат чIугунивди, башсагълугъвал гузва. Ишреф Примович Жаватован экуь къамат чи рикIелай алатдач.
“Лезги газетдин” редакциядин коллектив
