1-сентябрдиз Дербент райондин Араблинка хуьре 100 аялдиз чкаяр авай цIийи бахча ахъайна. Ам милли “Демография” проектдин сергьятра аваз эцигнавайди я.
Мярекатда Дагъустандин Гьукуматдин Председателдин заместитель Мурад Къазиева, Дербент райондин кьил Мавсум Рагьимова, военный кьилин эцигунардай управленидин начальникдин заместитель Эльдар Дамдамаева, РД-дин Халкьдин Собранидин депутатри, райондин кьилин заместителри, Араблинка хуьруьн кьил Арсен Вагьабова ва масабуру иштиракна.
Аялрин бахчадин кьве мертебадин дараматда гьам аялриз, гьамни тербиячийриз вири къулайвилер ава. Ина тIуьнар гьазурдай кьилдин кIвал (пищеблок), вири истемишунрив кьазвай медицинадин, школадиз гьазурдай, жуьреба-жуьре шейэр туькIуьрдай (изобразительный), логопед-муаллимдин, педагог-психологдин кабинетар ва гьакIни музыкадинни физкультурадин залар ава. Бахчадин мулкара къавар алаз туькIуьрнавай аялриз къугъвадай кьуд майданни кардик ква.
Дарамат ачухуниз талукьарнавай мярекатдал рахадайла, Мурад Къазиева къейдна: “Гьуьрметлу аялар, диде-бубаяр ва тербиячияр! За квез Чирвилерин йикъахъ галаз санал цIийи бахчани мубаракзава. Дугъриданни, чаз акурвал, райондин администрацияди чкадин такьатрихъ проектдик квачир хейлин шейэрни кухтунва. Аялрин бахча алай аямдин истемишунрив кьазвай вири тадаракралди таъмин я. Заз яшайишдин проектрин тереф хуьзвай республикадин Кьилин везифаяр вахтуналди тамамарзавай Сергей Меликоваз, райондин администрациядиз сагърай лугьуз кIанзава…”.
Гуьгъуьнлай рахай Мавсум Рагьимован гафарай малум хьайивал, алай йисан сифте кьиляй Дербент райондин Мугъарты хуьрени 60 чка авай аялрин бахча ачухна. Араблинкада бахча ахъаюникди 35 касдиз кIвалахдай чкаяр хьанва. Къведай йисуз ЛукIварин хуьрени 60 чка авай аялрин бахча ахъайдайвал я.
Къагьриман Ибрагьимов
