Чкайрал физ, агьалийрин фикир-хиял чирзавай Дагъустан Республикадин Кьилин везифаяр вахтуналди тамамарзавай Сергей Меликов и сеферда Къизилюрт райондиз мугьман хьана. Сифте нубатда ада яшайишдин идарайрал, агропромышленный комплексдин карханайрал кьил чIугуна.
Къизилюрт райондин администрациядин кьил Рустам Татархановахъ ва Кеферпатан Кавказдин военный округдин командующийдин заместитель, полициядин генерал-майор Абдулгьаким Гьажиевахъ галаз Кульзеб хуьре эцигнавай (60 чка авай) аялрин бахчадиз килигна. Ада анин къуллугъчийрихъ галазни хушвилелди суьгьбетарна.
Идалай гуьгъуьниз региондин регьбер Комсомольск хуьре эцигзавай аялрин бахчадин гьалдизни килигна. Дарамат эцигунин такьатар республикадин бюджетдай чара авунва. Эцигунардай организациядин векилди малумат гайивал, аялрин бахча тайинарнавай чIавуз ишлемишиз вахкуда.
Комсомольск хуьре авайла, Сергей Меликова консервиярдай “Эркенлъи” заводни кIвалахдай гьалдиз хкуникай ихтилат кудна. Къизилюрт районда хаммал бес кьадарда авайвиляй, заводдал налогарни алачирвиляй, карханадин директор Гьажимурад Гьажиева ам чкадиз хкун ва я ина инвесторрин куьмек галаз маса продукция акъуддай шартIар тешкилун теклифна. Са рахунни алач, кархана хъсандиз ремонтна кIанзава. Региондин регьберди йисан эхирдалди карханадиз лазим тир бизнес-проект гьазурунин ва ам талукь ведомстводал агакьарунин тапшуругъ гана.
Райондин агропромышленный комплексдин чешнелу карханайрик Нечаевка хуьре авай “Томат-Агро-Чар” компания акатзава. Адан генеральный директор Хирамегьамед Абдулмежидова лагьайвал, компания 2016-йисуз арадал атана. Адан кар алай хел агропромышленный комплексда инвестпроектар кьилиз акъудун я.
Компаниядин теплицайрин комплекс алай аямдин тадаракралди таъмин я, салан майваяр битмишардайла, Израилдин технологийрикай менфят къачузва. Коллективди гьасилзавай помидорар ва афнияр республикадилай къецезни рекье твазва. Гьар йисуз зегьметчийри са агъзур тонндилай виниз майваяр битмишарзава. Вири дережайрин бюджетриз 3 миллиондилай виниз налогар гузва.
С.Меликов — Къизилюрт шегьерда
Кеферпатан шегьерда региондин Кьил центральный больницадин эцигунрал фена. Ам 2008-йисуз эцигиз гъиле кьунай. Гила республикадин инвестицийрин программадик кутунвай дарамат 2023-йисуз ишлемишиз вахкун лазим я. С.Меликова алай вахтунда шегьердин ва райондин агьалийриз къуллугъзавай медицинадин идарадални кьил чIугуна. Больница лап куьгьнеди я. Къизилюртдин ЦГБ-дин кьилин духтур Патимат Шабановади лагьайвал, дарамат я цIай кьунин, я санитариядинни гигиенадин жигьетдай ийизвай истемишунриз жаваб гудайди яз амач.
Дагъустандин регьберди Къизилюрт шегьер кьве патал пайнавай автомашинар фидай муькъуьзни фикир гана. Вичел 550 метр яргъивал алай муьгъ 1987-йисуз эцигнай. Алай вахтунда ам чкIидай гьалда ава. Сергей Меликова РД-дин Гьукуматдин Председателдин сад лагьай заместитель Батыр Эмеевал РД-дин Минтрансдин ва шегьердин руководстводихъ галаз санал муькъуьз талукь месэладиз килигун, ам республикадин хсусиятдиз вахкудайвал авун ва ахпа муьгъ капитальнидаказ ремонтдай гьазурвилерни акун тапшурмишна.
Шегьерэгьлийрик секинсузвал кутазвай объектрик эцигна куьтягь тавунвай стадионни ква. 2010-йисуз стадион эцигун патал бюджетдай пулар ахъай хъувуначир. Алай вахтунда проектдинни сметадин документар цIийикIа туькIуьр хъувуна кIанзава. Стадион туькIуьр хъувунихъ галаз санал адан къвалав паркни хьун лазим тирдакай ихтилатна. Региондин Кьили Батыр Эмеевал стадион цIийи хъувун ва парк патал субсидияр чара авун тапшурмишна.
Къизилюртда республикадин Кьил чкадин агьалийрихъ галазни рахана. Абурун арада жегьил хизанар яшайишдин кIвалералди таъминарунин жигьетдай кардик квай программадин иштиракчиярни авай. Шегьерэгьлийрин гафаралди, программадин сергьятра аваз эцигзавай са шумуд мертебадикай ибарат кIвал гилани ишлемишиз вахканвач. Пудратчи карханади гзаф крар кьилиз акъуднавач.
Арзадихъ яб акалайдалай кьулухъ С.Меликова къейд авурвал, и месэладикай адаз виликдай шегьердин мэр Мегьамед Мегьамедовани хабар ганвай. Республикадин Кьили шегьерэгьлийриз кIвал вахтунда эцигна акьалтIарун патал региондин бюджетдай пулдин такьатар жагъурун хиве кьуна.
«Лезги газет»
