30-августдиз РФ-дин Гьукуматдин Председатель Михаил Мишустина вице-премьеррихъ галаз уьлкведин Президент Владимир Путина хизанриз куьмек гунин ва кIелунин цIийи йисаз гьазур хьунин жигьетдай ганвай тапшуругъар кьилиз акъудзавай гьалар веревирдна.
Аялар авай хизанриз
6-18 йисарин яшара авай аялрин диде-бубайриз 10 агъзур манатдин кьадарда аваз (гьар са аялдиз) пул чара ийида. И такьатрин куьмекдалди диде-бубайривай чпин аялар хъсандиз мектебдиз гьазуриз жеда.
РикIел хкин, и месэладиз талукь Указдал РФ-дин Президент В.Путина къул чIугунай. Пул къачун патал алай йисан 1-ноябрдалди “Госуслуги” сайтдиз ва я Пенсийрин фондунин отделенидиз арза рекье туна кIанзава.
ЦIийикIа туьхкIуьр хъувун
2022-йисан 1-январдилай гьам хуьруьн, гьамни шегьеррин чкайра авай мектебар цIийикIа туьхкIуьр хъувуниз талукьарнавай программа кардик акатда. 5 йисан къене уьлкведа 7 агъзурни 300 мектебдин дарамат цIийикIа туьхкIуьр хъувун фикирдиз къачунва.
РФ-дин Гьукуматдин Председателдин заместитель Татьяна Голиковадин гафаралди, Урусатдин мулкарал алай мектебрин 10 процентдихъ цIийикIа туьхкIуьр хъувунин игьтияж ава.
КIелунин йис гьикI гатIунда?
Вири мектебра тарсар адетдин къайдада кьиле фидайвал я. Михаил Мишустина къейд авурвал, коронавирусдихъ галаз тухузвай женг куьтягь хьанвач. Гьавиляй мектебра тIегъуьндин вилик пад кьун патал кардик кутунвай серенжемар давамарда. Аялрин ва муаллимрин сагъламвал хаталувилик кутуна виже къведач.
«Лезги газет»
