Саида Сражидиновна Эмирасланова биологиядин муаллим я. Ам 1978-йисуз Белиж поселокда хана, ина чIехини хьана. 1995-йисуз къизилдин медалдалди Белиждин гимназия акьалтIарай руш ДГУ-дин биологиядин факультетдик экечIна.
Муаллимвилин зегьметдин рехъ 1997-йисалай гимназияда гатIунна. Муаллимвал хкяна лагьана, Саида Сражидиновнади садрани пашманвал авунач. Аялриз тIебиатдин сирер чирун, абуруз биология кIанарун адан рикI алай кардиз элкъвенва. ДатIана цIийи чирвилерин суракьда авай муаллимдин тарсарни кьетIен жуьреда кьиле физва.
С. Эмирасланова тежриба авай пешекар, камаллу, бажарагълу педагог, лугьудайвал, муаллимвилин пеше ивидик квай инсан я. Ам тарс гузвай аялар пара кIан хьуналди, вичин пешедал ашукьвилелди, намуслувилелди, гьам аялриз, гьамни юлдашриз куьмекдин гъил яргъи авунин къилихралдини тафаватлу я. Муаллим ва классдин руководитель яз, гимназияда кIвалахзавай йисара ада са шумуд несилдиз чирвилер гана, уьмуьрдин шегьредал акъудна. Саида Сражидиновна аялрин кIеви дустни я. Гьавиляй гимназияда адан гъилик кIелай аялриз, абурун диде-бубайризни ам пара кIанда.
— Муаллим хьун, — лугьузва С.Эмираслановади, — гзаф жавабдар кIвалах я, гьикI лагьайтIа муаллимди неинки са аялриз тарсар гузва, гьакI вични гьамиша цIийи чирвилерин чешмейрин суракьда ава. — Машгьур писатель Н.В. Гогола икI лагьанай: “Масадаз тербия гун паталди эвелни-эвел жув тербияламишун лазим я”. Гьавиляй аялрал рикI хьун, викIегьвал, сабур, гафунал кIевиз акъвазун, жуван пешедиз вафалу хьун, фикир-хиялдин девлетлувал, зегьметдал рикI хьун, вири крар хъсан жедайдахъ инанмишвал авун — ибур вири муаллим жез кIанзавай инсандихъ хьун лазим тир къилихар я.
Школадиз фена, аялрин чинар акунмазди, рикIик шадвал акатда. Гьар са аял жуван къаршидиз къвезва: сада са цIийи хабар гузва, муькуьда вичин сир ачухзава, пуд лагьайда гъавурда гьат тавур кардикай хабар кьазва, бязибуруз чеб диндирмишна кIан жеда, — лугьузва муаллимди.
Саида Сражидиновна аялрин гьал-агьвалдикай хабар кьазвай, абурун гъавурда гьатзавай, гьар са аялдин яратмишунин алакьунар гьиссна, абур вилик тухуз алахъзавай муаллим я. Вишералди аялриз дерин чирвилер гун патал гьикьван къуват, кIанивал, къастни зегьмет герек къвезва муаллимдиз! Саида муаллимдин гъилик кIелзавай гзаф аялри олимпиадайра, конкурсра кIвенкIвечи чкаяр кьазва, гъалибвилер къазанмишнава. Мисал яз, 2018 -йисуз международный “Солнечный свет” олимпиадада 9-классра кIелзавай аялрин арада Асия Алибалаева ва 7-классра кIелзавай аялрин арада Самира Жамалдинова 1-чкайриз лайихлу, муниципальный “Йисан ученик — 2018” конкурсда Абдулхаликь Эмирасланов гъалиб хьана. Райондин сергьятра аваз тешкилзавай экологиядин “Брей-ринг” турнирда Саида муаллимди гьазурнавай командади гъалибвал къазанмишна. Вирироссиядин “Большая перемена” конкурсда Фариза Абдулмежидовади приздин чка кьуна.
Саида Эмираслановадин ученикри ингье адакай вуч лугьузватIа.
Рамазанова Ханум, 11-класс. — Саида Сражидиновна зи рикI алай муаллим я. Зун а кардал шад я хьи, ирид йис кьван я заз и гзаф хъсан инсанди тарс гуз, вични зи рикI алай тарс — биология. Адаз вичин предмет лап хъсандиз чида, чирвилер чавни агакьарзава.
Абдулмежидова Фариза, 11-класс. — Адан тарсуниз фейила, гуьгьуьл — ачух, виридаз хъсанвал ийиз, хъвер багъишиз кIан жеда. Саида муаллим гьар са четинвиляй хъвер кваз, гуьгьуьл ачух яз экъечIиз алахъзава. Ада чаз уьмуьрда герек къведай гзаф крар чирзава, меслятар къалурзава, насигьатар гузва. Саида Сражидиновнадин гъилик кIелай гьар са аялди адаз гьуьрметзава. Ам рикIиз чими, къени къилихрин инсан я.
Саида Сражидиновна кьилин дережадин муаллим я. Адакай “2018- йисан муаллим” ва “2021-йисан Дагъустандин лап хъсан муаллим” конкурсрин гъалибчи хьана. Адахъ “Учитель будущего” квалификация ава. 2019-йисалай Саида муаллимди вичин хсуси программадай “Зигьин авай аялрихъ” (“Работа с одаренными детьми”) галаз кIвалах тухузва. Районда муаллимрин арада “Сергьятар авачир музыка” лишандик кваз кьиле фейи конкурсда ам сад лагьай чкадиз лайихлу хьана. Вичин предметдай ам са шумуд сертификатдин сагьиб я. Экологиядин йисан сергьятра аваз ада тешкилна кьиле тухвай “Яд галачиз чилел уьмуьр авач” чIехи мярекат гилани аялрин ва муаллимрин рикIел алама.
Саида муаллим школадин дирекциядин, поселокдин ва райондин администрацийрин патай яргъал йисара образованидин хиле чIугвазвай гьакъисагъ зегьметдай хейлин грамотайриз, разивилин чарариз, дипломриз лайихлу хьанва.
Чи мурад чешнелу муаллимдихъ мадни еке агалкьунар хьун я.
Къагьриман Ибрагьимов
