СтIал Сулейманан районда хуьруьн майишатдин амай хилерихъ галаз санал саларбанвални виликди физва. Помидорар, афнияр районда гьасилиз гзаф йисар я. Эхиримжи вахтара ина суьрсетдин цIийи няметарни битмишариз эгечIнава, мисал яз, халияр, чичIекар, серкер, бадамжамар, келемар… Кьилди къачуртIа, алай йисуз ЦIийи Макьарин мулкуна — 20, ДаркIуш-Къазмайрал 6 гектарда гатун ва хъуьтIуьн халияр битмишарнава.
— Районда майвачивал вилик тухуник ва цIийи няметар гьасилуник лежбервилинни фермервилин майишатри, арендаторри еке пай кутазва, — лугьузва хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — ИкI, Герейханован хуьруьн мулкунал багъларин арайра некьияр цазва. Имни чи патара, шартIара цIийивал я. Мадни, алай йисуз районда сифте яз Эминхуьруьн мулкара арендаторри истивутар цанва. Чаз авай делилралди, анрай тарифдин бегьер кIватI хъийизва.
Мукьвара чун Эминхуьруьз истивутар цанвай салаз фена. Малум хьайивал, хуьруьн кьилихъ галай КIунтIар участокда истивутар гьасилунал арендаторар тир Жабир Юзбегов ва Расим Гьамзатов машгъул жезва. Истивутар са гектардилай виниз майданра цанва. Салан участокда авай хъсан къайда ва кьенерик квай истивутрин бегьер акурла, гуьгьуьл шад жезва. Сала истивутрин са шумуд сорт ава, чIехи пай кудайбур, къацу ва яру ранг алайбур я.
— Азербайжандай, Туьркиядай гъизвай истивутрилай чкадал битмишарнавайбур гьам еридин, гьам акунрин жигьетдай хъсанвилихъ тафаватлу я, — рабочийри кIватIнавай бегьердиз килигиз, лугьузва Гьамидин Абдулкъафарова. — Чкадин няметар экологиядин жигьетдайни михьи я.
Жабир Юзбеговани Расим Гьамзатова чаз лагьайвал, чкадин истивутрихъ муьштерийрин патай еке игьтияжни ава. КIватI хъувур истивутар хуьруьнвийрини маса къачузва, маса хуьрерай, районрай къвезвай муьштерийрин кьадарни тIимил туш. Идалайни гъейри, истивутар Кьасумхуьрел, Дербентда ва масанрани маса гузва.
Икьван чIавалди арендаторри 20 тонндилай виниз истивутар атIанва, мадни 20-25 тонн хъхьун вилив хуьзва.
Чун салаз фейи чIавуз истивутар атIунал 12 кас машгъул тир. Масират Рамазановади, Валида Бабаевади, Нурижат Къурбановади, Зейнаб Абдулаевади ва масабуру чаз лагьайвал, арендаторри абуруз кIвалахдин мажиб яз гьар юкъуз 1200 манат пул гузва, кIвалериз хъфидайла, гьардав 4-5 килограмм истивутарни вахкузва. И кардилай абуру разивалзава.
Жабир Юзбегованни Расим Гьамзатован гафаралди, районда гьавадин шартIар ва накьвадин къурулуш истивутар гьасилун патал кутугайбур я. Гьавиляй абурухъ къведай йисарани истивутар битмишардай ва майданар мадни артухардай фикир ава.
Хазран Кьасумов
