13-августдиз чи арадай къени инсан, хуьруьн майишатдин рекьяй хъсан пешекар Абдурагьимов Аскер Ханбалаевич акъатна. А.Абдурагьимов 1939-йисуз Кьурагь райондин КьепIиррин хуьре дидедиз хьана. 1959-йисуз юкьван мектеб куьтягьайдалай гуьгъуьниз Дербентдин культпросветучилищеда кIелна. И чIавуз Лезгийрин госмуздрамтеатрдин коллективдик кваз 1960-йисуз Москвада Дагъустандин культурадин ва искусстводин декадада иштиракна.
Зегьметдин рехъ 1962-йисуз ВЛКСМ-дин Кьурагь райкомдин инструкторвилелай башламишна. Советрин Армиядин жергейра къуллугъдайла, Аскер дивизиядин комсомол организациядин азаднавай секретарь, Ивановодин хуьруьн майишатдин институтда кIелзавай йисарани и вуздин ВЛКСМ-дин бюродин член тир. Институт куьтягьайла, “Курахский” совхозда зоотехниквиле, кьилин зоотехниквиле кIвалахна. 1975-йисуз А.Абдурагьимов партиядин Кьурагь райкомдин тешкиллувилин отделдин инструкторвиле тайинарна. Ахпа адакай хуьруьн майишатдин управленидин кьилин зоотехник, КьепIиррин хуьруьн “Коммунизм” тIвар алай колхоздин председатель хьана. И йисара алафдин база мягькемарна, цадай чилерин майданар артухарна, фадлай рикIелай алатнавай нехв цана, магьсулрин хъсан бегьерар къачуна. Гьайванрин жинс хъсанарна. Машинринни тракторрин парк мягькемарна.
1990-йисуз Аскер Ханбалаевича агалкьунралди диссертация хвена, хуьруьн майишатдин илимрин кандидатвилин тIвар къачуна. Аграрный техникумда лекцияр кIелна, Дагъустандин госплемобъединенида кьилин пешекарвиле кIвалахна. Пенсиядиз экъечIдай вахт мукьва жедайла, хайи хуьруьз хтана, анин администрацияда секретарь хьана.
Гьина, гьи къуллугъдал хьанатIани, А.Абдурагьимова вич хъсан тешкилатчи, кар алакьдай пешекар яз къалурна. Чна рагьметлудан хизанриз, багърийриз, мукьва-кьилийриз, вири кьепIирвийриз, дериндай хажалат чIугунивди, башсагълугъвал гузва. Адан экуь къамат чи рикIерай садрани акъатдач.
Бажанах — Нисрет Исмаилов, ярар-дустар, чирхчирар —
Даир Бейбалаев, Шихмурад Шихмурадов,
Мердали Жалилов, Шагьисмаил Гьажимирзоев.
