Коронавирусдиз акси рапар янавайбурун арада Россияда лотерея кьиле тухуда ва гъалибчийриз 100 агъзур манат пул гуда. Идан гьакъиндай РФ-дин премьер-министр Михаил Мишустина къарардал къул чIугуна.
Къейдзавайвал, лотерея 18 йисалай виниз яшар хьанвайбуруз талукь я. Гъалиб хьайибурув пулдин такьатар анжах “Мир” картадин куьмекдалди агакьарда.
“Серенжем, вакцинадин рапар янавайбуруз талукь Сад тир регистрдин делилрал асаслу яз, алай йисан 1-сентябрдилай 1-декабрдалди кьиле фида”, — лагьанва малуматда.
Гъалибчияр инсанрин иштираквал авачиз компьютерди хкяда. Санлай къачурла, иштиракчийрин арадай са агъзур гъалибчи тайинарда. Серенжем кьиле тухуз эгечIдалди раб ягъиз агакьай вирибурувай лотереяда иштиракиз жеда. Нетижаяр махсус комиссияди кьадайвал я.
Нетижайрикай ЕПГУ-дай (Единый портал государственных и муниципальных услуг), жуван хсуси кабинетдиз гьахьна, чириз жеда. Идалайни гъейри, нетижаяр “Бонусзаздоровье.рф” сайтда чапда.
“Хизандин ипотека”
Алай йисан июлдилай “Хизандин ипотека” программадикай са аял (2018-йисан 1-январдилай хьайи) авай хизанривайни менфят къачуз жеда. Талукь къарар РФ-дин Гьукуматди алай йисан 30-июндиз акъудна.
“Хизандин ипотека” аялар авай хизанривай яшайишдин кIвалерин шартIар кьезил кредитдихъ хъсанариз хьун патал 2018-йисуз кардик кутур программа я. Адал асаслу яз, адетдин ва кьезил ипотекадин арада жезвай тафават Гьукуматди вичин хивез къачунва.
“Хизандин ипотекадай” регионрин хизанривай вини кьил 6 миллион кредит къачуз жеда. Кредитдал къвезвай кьил 6 процентдикай ибарат я. Программадин тамам шартIар гьихьтинбур ятIа галай-галайвал МФЦ-дин идарайрай ва я “Дом.рф” сайтдай чириз жеда.
«Лезги газет»
