Мукьвара СтIал Сулейманан райондин кьил Нариман Абдулмуталибова “Самоучитель лезгинского языка” проект веревирд авун патал совещание кьиле тухвана. Ана интернетдин алакъадин куьмекдалди и проект кьилиз акъудунал машгъул жезвайбурукай сад тир ФЛНКА-дин Советдин член Гьуьсен Шагьпазова (ам проектдин куратор я) ва лезги чIалан муаллимрин са дестеди иштиракна.
Къейд ийин хьи, “Самоучитель лезгинского языка” проектдин тереф миллетрин крарин рекьяй федеральный Агентстводини хвенва. Урус чIалал ихьтин тIвар алай ктаб гьазурунин карда СтIал Сулейманан райондин кьил Нариман Абдулмуталибова, и райондин образованидин управленидин информациядинни методикадин центрадин методист Назират Азимовади, лезги чIалан муаллимар тир Гуьзел Межидовади, Аксинья Жаватовади, Жамиля Жигеровади, А.А.Тахо-Годидин тIварунихъ галай педагогикадин институтдин илимдин къуллугъчи Жаклина Мейлановади, “Лезги газетдин” кьилин редактордин заместитель Куругъли Ферзалиева ва масабуру иштиракда.
Мярекатдин сергьятра аваз Гьуьсен Шагьпазова ктабдихъ галаз санал хайи чIал чирдай интернетдин махсус приложение арадал гъунин теклиф гана. Вичин нубатда Нариман Абдулмуталибова проектдин ва приложение арадал гъунин теклифдин тереф хвена ва хайи чIал вилик тухун патал тешкилзавай кIвалахра райондин администрация куьмек гуз гьазур тирдакай лагьана.
«Лезги газет»
