20-августдиз Дагъустандин Кьилин везифаяр вахтуналди тамамарзавай Сергей Меликова ВКС-дин къайдада (интернетдин алакъадин куьмекдалди) республикадин образованидин идарайра кIвалахзавайбурухъ галаз совещание кьиле тухвана. Адан сергьятра аваз кIелунин алатай йисан нетижаяр кьуна, мектебар кIелунин цIийи йисаз гьикI гьазур хьанватIа, акьалтзавай несилрихъ галаз тербиядин рекьяй тухузвай кIвалах, образование вилик тухунин рекьер, жемиятда муаллимди кьазвай чка ва маса месэлаяр веревирдна.
Совещанидал Сергей Меликова хабар гайивал, 2021-йисан эхирдалди республикада цIийи 16 мектебни аялрин 57 бахча ахъаюн фикирдик ква. Образованидин саки вишелай виниз идарайра цIийикIа туьхкIуьр хъувунин кIвалахар кьиле тухванва.
“За мад сеферда жавабдар ксарин фикир желбзава: йисан эхирдалди ахъаюн патал фикирдиз къачунвай мектебарни аялрин бахчаяр вахтунда ва лазим тир ери аваз ишлемишиз вахкана кIанзава”, — лагьана РД-дин Кьили и кардал машгъул жезвай къурулушрин векилриз.
С.Меликован гафаралди, са йисан къене образованидин и кьадар идараяр ахъаяй дуьшуьшар вилик йисара малум туш.
Вичин рахунра ада хуьруьн мектебра кIвалахдал жегьил муаллимар желб авуникайни лагьана. И жигьетдай ада районрин кьилериз герек тир вири шартIар тешкилун, кIвалах кьиле тухун тапшурмишна.
Вичин рахунра РД-дин образованидин ва илимдин министрдин везифаяр вахтуналди тамамарзавай Яхья Бучаева къейд авурвал, федеральный ва республикадин программайрин сергьятра аваз 2023-йисалди Дагъустанда 82 мектебни аялрин 84 бахча эцигун планрик кутунва. Адан гафаралди, и месэла гьялиз алакьайтIа, мектебра кIелдай алава — 29438, аялрин бахчайра 11857 чка пайда жеда.
Министрди алава хъувурвал, алай йисан 1-сентябрдиз республикада цIийи 7 мектебни аялрин 13 бахча ахъайда.
Совещанидикай гегьеншдиз “Лезги газетдин” сайтдай кIелиз жеда.
Агьмед Магьмудов
