Мегьарамдхуьруьн райондин Хтун-Къазмайрин хуьруьн жемятди Дагъустандин регьбер Сергей Меликоваз тавакъудин чар кхьена, Инстаграмда авай адан аккаунтдиз рекье туна. Чарчин копия “Лезги газетдин” редакциядизни агакьарнава.
Кьилди къачуртIа, жемятди кхьизва: “Гьуьрметлу Сергей Алимович! Мегьарамдхуьруьн райондин Хтун-Къазмайрин хуьруьн агьалийри, чи республикадин къени фикирар авай вири агьалийри хьиз, Квез Куьне Дагъустан патал ийизвай кьван вири хъсан крарай рикIин сидкьидай сагърай лугьузва. Икьван чIавалди гьич садрани чи республикадиз федеральный центради, алай вахтунда хьиз, къайгъударвилин фикир, финансрин куьмек гайиди туш. Чаз чизва, им Куь, Сергей Алимович, чалишмишвилерин нетижа я.
Куьне кьабулзавай гьар са къарарди, къачузвай гьар са камуни чун, хуьрерин зегьметчи инсанар, а кардихъ инанмишарзава хьи, Куьн, Сергей Алимович, халкьдихъ, жергедин агьалийрихъ рикI кузвай, инсандин къадир авай регьбер я.
Чна Куь сиясатдин, кадрийрин гьакъиндай къараррин тереф хуьзва. “Дагестанавтодор” ГКУ-дин кьиле Ханмегьамед Рагьимов тайинарунин къарардин — иллаки. Ада, объектрин метлеблувилелай аслу яз, рекьер эцигуниз, цIийикIа туьхкIуьр хъувуниз такьатар чара авунин карда и ведомстводиз гьахълувилин принцип хкана. Аквазвайвал, эхиримжи вахтара ведомстводин кIвалахни хъсан хьанва.
Анжах Х.Рагьимован чалишмишвилер себеб яз, стратегиядин, республикадин метлеб авай “Ново-Гапцах-Капир-Казмаляр- Ялама” шегьре рекье къир цана куьтягьиз алакьна.
Ханмегьамед Мегьамедовича, вичихъ галаз гуьруьшмиш хьайила, Хтун-Къазмайрин хуьруьн жемятдиз гайи гаф — хуьруьн юкь тирвал Приморскийдиз физвай рехъ пуд километрдин мензилда цIийикIа туьхкIуьр хъувун “Дагестанавтодор” ГКУ-дин” 2021-йисан къалин планрик кутун — кьилиз акъудна. И рехъ курортринни туриствилин метлеб авай Самурдин тамун, Каспий гьуьлуьн виридалайни михьи яз амай къерехдихъ физвайди я. Хуьряй физвай рекьин участок, фурар акъатна, михьиз кукIвар хьанва. Зарбдиз физвай джиприни автобусри, мичIи циф хьиз, залан руг къарагъарзава. Агьалийривай кIвализ михьи гьава атун патал рак-дакIар ахъайиз жезвач. Багълар, салар йисан кьиляй-кьилиз къванцин руквадин къат ацукьна жезва.
Иниз гьар йисуз, ял ягъиз, Дагъустандин хуьрерайни шегьеррай, Урусатдин маса регионрай агъзурралди мугьманар къвезва. Хуьруьнвияр авай и чIуру гьаларикай, четинвилерикай рахун тавуртIани, Дагъустандин ихьтин гуьзел региондикай, мугьманпересрикай, къени къилихрин чкадин агьалийрикай ва икьван “къайгъудар” властрикай къвез-хъфизвай мугьманриз гьихьтин фикир амукьзава? Хуьруьн сечкичийри гьар сечкийриз сесер гуналди тереф хуьзвай чи властрикай?
Хуьруьн куьче-рехъ авай гьал акур мугьманри чаз, хуьруьн жемятдиз, айибар гъизва: “Куьне ихьтин гьал гьикI эхзавайди я? Вучиз эхзавайди я?”, — хабар кьазва абуру.
Кар ана ава хьи, рехъ цIийикIа туьхкIуьр хъувунин проект фадлай гьазур хьанва, бес кьадар пулни чара авунва. КIвалахар “Дагестанавтодордилай” аслу тушир себебриз — жуьреба-жуьре идарайра авай бюрократвилин къайдайриз, “разрешенийриз”, “меслятунриз”, экспертизайриз килигна, гъиле кьаз жезвач. Гьа и кар себеб яз, ракьун рекьелай переезд эцигунин кIвалахрив эгечIиз тежез са йис я.
Чна Квевай, Сергей Алимович, и месэла гьялиз куьмекун тIалабзава. “Вучиз куьне ихьтин гьал эхзавайди я?” суалдиз чна жаваб гузва: чун республикадин къенин руководстводихъ инанмиш я, чна адаз ихтибарзава.
Гьуьрметдивди
Мегьарамдхуьруьн райондин
Хтун-Къазмайрин хуьруьн жемят”.
