Са тIимил йикъар идалай вилик Казанда какахьай женгерин текба-тек экъечIдай бягьсерай — ММА-дай — Европадин чемпионат ва кIвенкIвечивал патал акъажунар акьалтIна.
Дуьньядин 14 уьлкведин спортсменри чпин устадвал къалурай бягьсера россиявийри — гьам итимри ва гьамни дишегьлийри хъсан нетижаяр къазанмишна. Абурун арада чи ватандаш, вичин ери-бине Ахцегь райондин Хкемрин хуьряй тир, алай вахтунда Астрахань шегьерда яшамиш жезвай Динислам Зейнединовани иштиракунал ва Европадин чемпионвилин тIварцIиз лайихлу хьунал чна иллаки шадвалзава. Чи ватандашди 83,9 кг-див агакьдалди заланвал авайбурун арада, 4 бягьсинани виниз тир устадвал къалуруналди, гъалибвал къазанмишна.
Динислам 1993-йисуз Астраханда дидедиз хьана. Сифтедай кикбоксингдал, азаддаказ кьуршахар кьунал машгъул хьана, гуьгъуьнлай какахьай бягьсерал элячIна. Жегьилди СГЮА акьалтIарнава. Тренерар тир Шамил Мегьамедовичан (старший тренер), Шамил Гъазиеван ва Рустан Умалатован регьбервилик кваз вичин устадвал хкажзава.
Алатай йисара Д.Зейнединова Россиядин Кубок патал акъажунра (2019-йис, Элиста), ЮФО-дин чемпионатда (2020-йис, Самара) ва маса акъажунра гъалибвилер къазанмишна. Алай йисуз Кемеровада кьиле фейи уьлкведин чемпионатда гъалибвал къазанмишай ам Европадин чемпионатдиз рекье туна. Европадин чемпионвилин тIвар ада дуьньядин спортдин кесерлу майданра къазанмишнавайбурукай сифтегьан чIехи агалкьун я. Мубаракрай!
Рагнеда Рамалданова
