23-августдиз 86-йисан яшда аваз бажарагълу муаллим-методист, дидед чIалахъ кIевелай рикI кайи лезги хва Насрединов Фахрудин Насрединович кечмиш хьана. Рагьметлудаз женнетар кьисмет хьурай.
Ф.Н.Насрединов Мегьарамдхуьруьн райондин Агъа Ярагърин хуьре 1935-йисуз дидедиз хьана. 1960-йисуз ДГУ-дин филфак (РДО) акьалтIарна, Мегьарамдхуьруьн М.Гьажиеван тIварунихъ галай 1-нумрадин юкьван мектебда 50 йисуз хайи чIалай ва литературадай тарсар, хейлин йисара райондин лезги чIаланни литературадин муаллимрин кIватIалдиз методикадин рекьяй регьбервал гана.
Ф.Н.Насрединован гъиликай “Гьаким Къурбан мектебда”, “Етим Эминан яратмишунрай тарсар”, “Грамматикадин разборар”, “Лезги чIалан ва литературадин тарсара кхьинрин кIвалахар”, “Лезги чIал” (Х-ХI кл.) учебник, “Лезги чIалай тарсар” (Х-ХI классар патал) пособие, “Лезги чIалан синонимрин кIватIал” ва методикадин хейлин маса ктабар хкатна.
Ам Тажидин гьажи Къазибегова араб чIалай таржума авур имам Ал-Гъазалидин “Дуьз рекьин эвел” ктабдин редактор, Алкьвадар Гьасан эфендидин “Асари-Дагъустан” ктабдин шиирринни абурун баянар ачухарунин таржумачи, “Лезги халкьдин камалдин хазинадай” (мисалар, мискIалар) пособидин, “Аюхар” — шииррин ктабдин автор я.
Хайи чIалан хазинадай ва Ф.Н.Насрединован вичин илимдинни яратмишунрин ирсинай хейлин затIар, гьайиф хьи, чапдай акъудиз агакьнач.
Ялавлу ватанперес Ф.Н.Насрединован экуь къамат санал кIвалахай юлдашрин, ученикрин рикIера амукьда. Чна рагьметлудан хизандиз, мукьва-кьилийриз, дериндай хажалат чIугуналди, башсагълугъвал гузва.
Санал кIвалахай юлдашрин десте
