СтIал Сулейманан райондин администрациядин пресс-къуллугъди хабар гайивал, меценатри Бутхуьре кIелдай 60 чка авай мектеб ва гьа кьадар аялар патал ясли-бахча эцигдайвал я. Проект кьилиз акъудун патал 200 миллион манатдилай виниз такьатар харжда.
Лагьана кIанда, Бутхуьруьн мектеб райондин аварийный гьалда авай къадакай сад я. Аялрин бахчадикай рахайтIа, ам и ва патарив гвай хуьрера ерли авач. Къейд ийин хьи, алай вахтунда чкадин агьалийрин кьадар 450-дав агакьнава. Бутхуьр Шихидхуьруьн администрациядик акатзава.
Мектеб ва аялрин бахча эцигун патал чил чара авунва. Проектдинни сметадин документацияни гьазурна акьалтIарнава.
СтIал Сулейманан райондин кьил Нариман Абдулмуталибова Инстаграмда авай вичин аккаунтда къейднавайвал, Бутхуьре мектебни аялрин бахча эцигуниз пулдин такьатар ахъайзавайди меценат Сулейман Керимован уьмуьрдин юлдаш Фируза Назимовна я.
Къейд ийин хьи, объектар эцигун патал райондин администрацияди меценатрихъ галаз санал государстводин программада иштиракдайвал я.
«Лезги газет»
