Инсан дуьньядал атайла, адан уьмуьрдин рехъ гьихьтинди жедатIа, гьич са касдизни чир жедач. Амма диде-бубади гузвай эвелан тербиядилай, вердишвилерилай, инанмиш я, касдин уьмуьрдин са кьадар терефар аслу жеда. Жув дуьзди хьайила, кьисметни дуьзди жеда, лугьуда камаллу ксари.
Эмирбегова (Хариева) Каммуна Кьурагь райондин КьепIиррин хуьре 1951-йисан 17-августдиз къалин хизанда дидедиз хьана. Буба Къадир фад, руша гьеле гъвечIи классра кIелзамайла рагьметдиз фенай. Амма, акьалтай четивилеризни килиг тавуна, дидеди вичин 5 велед — 3 хвани 2 руш — баркаллувилелди, савадлубур яз чIехи авуна, гьар сад са пешедин иеси жедай мумкинвилер яратмишна. 1969-йисуз, хуьруьн мектеб акьалтIарайдалай кьулухъ рикIе экуь мурадар авай руш Дербентдин медицинадин училищедик экечIна. 1973-йисуз диплом къачур Каммуна Къадировнади Кьурагь райондин больницада дежурный медсестра яз кIвалахунилай вичин зегьметдин рехъ башламишна.
Кьве йис акваз-такваз акъатна — Каммунади вичин хуьруьнви Эмирбегов Гьусенбаладихъ галаз кьисметар сад авуна.
Са кьадар вахтунилай, юлдаш Самурдин тамухъанвилин майишатдиз кIвалахал рекье тун себеб яз, жегьил хизан Мегьарамдхуьруьн райондин Тагьирхуьруьн-Къазмайрал куьч хьана. Каммунади Тагьирхуьруьн-Къазмайрин участокдин больницада медсестра яз кIвалахиз башламишна, 2021-йисан апрелдалди зегьметдин рехъ давамарна. Тагьирхуьруьн-Къазмайрин больницада жуьреба-жуьре духтуррин куьмекчи медсестра яз, Каммуна Къадировнади 46 йисан вахтунда агьалийриз къуллугъна. Гьакъисагъ зегьметдалди Каммуна Къадировнади здравоохраненидин отличник (2006-йис) ва зегьметдин ветеран (2001-йис) лагьай баркаллу тIварар къачуна.
Кардин гъавурда авай, савадлу, дагъвийриз хас къилихрин дишегьлиди кIвалахдин рекьяй юлдашрин, участокдик акатзавай хуьрерин агьалийрин арадани еке гьуьрмет къазанмишнава. И кардин себебрикай мад сад ам я хьи, кьуд аялдин диде яз, ада вичин веледарни лезги намусрал, инсанрихъ галаз дуьз рафтарвилин къайдайрал бинеламиш яз тербияламишнава. Абур гьар сад вичин хизандин — кIвалин ва пешейрин иесияр хьанва.
ИкI, хва Эрзимана Росгвардияда, Мирзебалади МВД-дин къурулушда къуллугъзава, рушар Аманат ва Разият муаллимар я. Къе Каммуна дидедин рикI 7 хтулди шадарзава.
Чна Каммуна Къадировнадиз и йикъара тамам жезвай 70 йисан юбилей мубаракзава ва къени, чими келимайралди алхишдин гафар лугьузва.
Жасмина Саидова
