7-8-августдиз Кьурагь райондин администрациядин физкультурадинни спортдин ва жегьилрин крарин рекьяй отделди спортдин ва сагълам уьмуьрдин таблигъат тухунин мураддалди Гелхенрин хуьре волейболдай райондин вини зонадин хуьрерин жегьилрин командайрин арада 2-сеферда яз акъажунар тешкилна. Идакай райадминистрациядин пресс-къуллугъди хабар гузва.
Алатай йисуз хьиз, цIини турнирда хуьрерин хкягъай 4 командади иштиракна: Ашарин, Шимихуьруьн, Куквазрин ва Гелхенрин.
Вири къугъунар акьалтIайдалай кьулухъ турнирдин гъалибчи Гелхенрин хуьруьн командадикай хьана. Куквазвийри 2-чка кьуна, шимихуьруьнвийри — 3-чка. Тешкилатчийри вири командаяр медалралди, грамотайралди, кубокралди ва спортдин призралди къейдна. Лап хъсандиз къугъвайбурув пулдин пишкешарни вахкана.
__________________________________________
Куьрелди
ТIвар-ван авай футболист, вичин ери-бине Сулейман-Стальский райондин Эминхуьряй тир Сердер Сердеров Хорватиядин Пула шегьердин “Истра” ФК-диз хъфена.
Икьван чIавалди ам Венгриядин “Мёзекведеш” командада къугъвазвай. Алатай сезонда ада иштиракай клуб Венгриядин кубокдин финалдиз акъатнай.
* * *
Европадин кубок патал 7-8-августдиз Оренбургда дзюдодай кьиле фейи акъажунра чи пагьливанрини кишпирдин медалар къазанмишна.
“Вконтакте” соцсетда авай “IEZGI SPORT” аккаунтди хабар гузвайвал, кишпирар къачурбурун арада чи ватанэгьли Имран Юсифов (Азербайжан) ва Саид Гьажиев (Москва) ава.
«Лезги газет»
