Япониядин меркезда 23-июлдилай 8-августдалди кьиле фейи олимпиададин къугъунрин нетижада Россиядин спортсменри спортдин са шумуд жуьредай 71 медаль къазанмишна.
Гатун олимпиададин къугъунар шад гьалара акьалтIаруниз талукь яз Токиода кьиле фейи мярекатда Россиядин хкягъай командадин — Россиядин олимпийский комитетдин — пайдах Абдулрашид Садулаева кьуна. РикIел хкин, А.Садулаева 2016-йисуз Рио-де-Жанейрода кьиле фейи олимпиададин къугъунрани кьуршахар кьунай къизилдин медаль къазанмишнай.
Россиядин хкягъай командадиз хьайи 71 медалдикай 6 медаль дагъустанви спортсменри къазанмишна: Абдулрашид Садулаева — къизилдин, Альберт Батыргъазиева — къизилдин, Завур Угуева — къизилдин, Муслим Гьажимегьамедова — гимишдин, Зенфира Мегьамедалиевади — кишпирдин, Гьажимурад Рашидова — кишпирдин.
Медалрин жигьетдай Россия 5-чкадал (20-28-23) ала. Сад лагьай чка США-ди кьуна (39-71-33), кьвед лагьай чка — Китайди (38-32-18), пуд лагьай чка — Японияди (27-14-17), кьуд лагьай чка — Великобританияди (22-21-22).
Медалар къазанмишай вири россиявийриз уьлкведин Президент Владимир Путина чIехи агалкьунар мубаракна. РД-дин Кьилин везифаяр вахтуналди тамамарзавай Сергей Меликовани олимпиадада къизилдин, гимишдин ва кишпирдин медалар къачур дагъустанви пагьливанар кьилди-кьилди тебрикна.
Олимпиада Японияда алатай йисуз кьиле фин лазим тир. Амма, коронавирусдин тIугъвал себеб яз, акъвазарнай.
«Лезги газет»
