5-августдиз яргъал чIугур гужлу марфарин нетижада селлер атуникди Ахцегь районда хуьруьн майишатдиз, рекьер-хуьлериз, яшайишдин объектриз хейлин зиянар хьана.
Кьилди къачуртIа, машиндин “Ахцегь-Къурукал-Хинер” рекьин 3-километрда, “Лай” участокдин къаншарда, рехъ селди кьуна, республикадин “Мегьарамдхуьр-Ахцегь-Рутул” автошегьредин бязи чкаяр чIур хьана, дигидай цин “Ахцегь-КьакIар” ва Ахцегьа гуьне патан майишатрин къаналар кьарадив ацIана, Калукрин ва Къурукаларин хуьрера яшайишдин бязи кIвалерин подвалар ци къачуна, ГЭС-дин къаналдин кьил вацIу тухвана ва икI мад. Идалай вилик къвайи гужлу марфарин нетижада “Ахцегь-Мацар” рекьин 2,5 километрдин участокдиз ва “Мацар-Ахцегь” цин турбадин кьилин имаратдиз еке хасаратвилер хьана.
Алай вахтунда Ахцегь муниципалитетдин кьил Осман Абдулкеримован гуьзчивилик кваз райондин хсуси къуватралди тIебиатдин бедбахтвилер алудна бегьемарзава. Гъилевай гьафтеда цин къаналризни булахриз агьалийри ишлемишдай яд хъияда.
Дашдемир Шерифалиев
* * *
Юргъади Кьурагь райондин экономикадизни, хуьруьн майишатдизни еке зиянар гана. Къати марфарин нетижада селлер атуникди, муькъвериз, мукъверилай элячIдай чкайриз, чкадин ва республикадин дережадин улакьрин рекьериз хасаратвилер хьана. Багъларани салара авай емишризни майвайриз гайи зиянарни гъвечIибур туш.
Алай вахтунда райондин хуьрериз физвай рекьер къайдадик кухтунин кIвалахар давам жезва.
«Лезги газет»
