ЦIай туьхуьриз жезвач

Якутияда цIай кьур тамарин умуми майдан 6 миллион гектардилайни гзаф я. ЦIай инсанар яшамиш жезвай кIвалеривни агатзава. Зегьем гьавадини къати гару цIай туьхуьруниз манийвал гузва. Алай вахтунда Якутияда кьетIен гьаларин режим кардик кутунва.

Тамари цIаяр кьур дуьшуьшар Россиядин маса регионрани гзаф хьанва.

Вакцинадиз хъсан къимет гана

Австралиядин алимри Россиядин коронавирусдиз акси “Спутник V” вакцинадин таъсирлувилиз къимет гана. Абуру чпин фикирар “The Sydney Morning HeraId” чешмедиз гайи интервьюда къейднава.

ИкI, медицинадин ахтармишунрин Бернета институтдин профессор  Майкл Тула “Спутник V” лап хъсан вакцина я лагьана. Ада къейд авурвал, вакцинади коронавирусдин вилик пад кьунин­ карда ийидай таъсирлувал 92 процентдиз барабар я. Ада алава хъувурвал, “Спутник V” ишлемишзавай 60 уьлкведикай гьич садани са гьихьтин ятIа четинвилер, шаклувилер арадал атана лагьанвач.

ВОЗ-диз меслятар къалурзавай Австралиядин вирусолог Гэри Громаннани Россиядин вакцинадиз еке къимет гана.

Мад пул тIалабзава

Белоруссиядин президент А. Лукашенкоди тIугъвалдихъ галаз женг тухун патал Россиядивай пул кредитда къачудайвал я. Международный валютайрин фондуни Белоруссиядиз пулдин такьатар чара авуник кьил кутунач.

Къейд ийин, Россияди Белоруссиядиз 2020-йисуз 1,5 мил­ли­ард доллар кредитда вугун хиве кьунай. Алай йисан июндин вац­ра а уьлкведив Россиядин патай 500 миллион доллар ­агакьна.

Къанунсузвал

США-да авай Россиядин векилханади Сирияда Америкадин кьушунар къанунсуздаказ авайдакай малумарна. Идакай “Известия” чешмеди хабар гузва.

Идалай вилик террористриз акси коалициядин кьил У.Мароттоди чпин кьушунар Сирияда аваз хьуни са къанунсузвилизни рехъ тагузвайдакай, кьушунрив “мандат” гвайдакай лагьа­най.

Шегьерар кьазва

Россияда къадагъа авунвай террористрин “Талибан” тешкилатдин боевикри Афгъанистандин кеферпата авай Саманган вилаятдин меркезни кьуна. Айбак шегьер талибрин гуьзчивилик акатанвай ругуд лагьай меркез я.

США-ди ва НАТО-дин уьлквейри чпин кьушунар ахкъудиз эгечIайдалай кьулухъ Афгъанистанда гьалар къизгъин хьана.

Аксивилиз — аксивал

Минскдин гьукумдарри туьквенрин иесийривай Белоруссиядиз акси санкцияр кардик кутунвай уьлквейрин метягьар дезгейрилай алудун истемишнава. Идакай “Лента.ру” чешмеди хабар гана.

ИкI, гила Украинадай, Литвадай ва Польшадай гъанвай ме­тягьар туьквенрин аквадай дезгейрал эцигун къадагъа я. Эгер туьквенрин иесийри гьукумдаррин гафуниз яб тагайтIа, талукь тир серенжемар кьабулдайвал я.

Яракьлувал мягькемарна

Тажикистанда авай Россиядин военный базадив цIай гудай цIийи яракьар, “Вебра” ПЗРК-ар (переносной зенитный ракетный комплекс) агакьна.

“Новости” РИА-дин делилралди, вири яракьар РФ-ди Тажикистандихъ ва Узбекистандихъ галаз санал кьиле тухвай вердишвилеринни ахтармишунрин серенжемра кардик кутунай.

ТIугъвал себеб яз

Гуржистандин президент С.Зурабишвилиди уьлкведа коронавирусдин тIугъвалдихъ галаз алакъалу гьалар пис хьуникди халкьдин гегьенш къатарин мярекатра иштирак тавун кьетIнава. Идакай “Sputnik Грузия” TeIegram-каналди хабар гана.

Ковид чукIунин гьалар къизгъин хьанвайвиляй Зурабишвилиди вири гуьруьшар, мярекатар кьулухъ элкъуьрнава. Ада То­кио­да кьиле фейи олимпиадада агалкьунар къазанмишай спортсменар къаршиламишунин мярекатдани иштиракнач.

Гуржистанда 9-августдилай жемиятдин чкайра маскаяр алу­кIун чарасуз серенжем яз тестикьарнава.

ЧукIун давам жезва

Дуьньядин уьлквейра коронавирус чукIун давам жезва. 11-августдин делилралди, ковид акатнавайбур виридалайни гзаф США-да ава — 36 миллиондилайни виниз. Кьвед лагьай чкадал Индия ала (32 миллион), пуд лагьай чкадал — Бразилия (20 миллиондилай артух), кьуд лагьай чкадал — Россия (6,5 миллион), вад лагьай чкадал — Франция (6,2 миллион).

«Лезги газет»