Дагъустандин Гьукуматдин Председатель Абдулпатагь Амирханов министрар ва са десте жавабдар къуллугъчияр галаз алатай гьафтеда Рутул райондиз фена. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Дагъустандин дагълух районрин арада виридалайни еке районда премьер-министр яшайишдин са жерге объектриз килигна, улакьрин рекьерин, экверин майишатдин ва газ тухунин месэлаяр ахтармишна.
Абдулпатагь Амирханов Россиядин мулкарал алай диндин къадим (11-асирдин) объектрикай сад тир ЦIахуррин медресадизни фена. Дараматдихъ неинки цIахуррин халкь, гьакI вири Кавказ, Россия патални еке къиметлувал ава. Махсус чирвилер гунилай гъейри, медресада илимдин кIвалахар цIийи кьилелай кхьин хъувунин крарни кьилиз акъудна.
ЦIахур дередин имам Эльдар Сулейманован гафаралди, медресада къенин юкъузни тарсар гун давам жезва. Коронавирусдин тIугъвал себеб яз бязи тарсар онлайн жуьреда кьиле тухузва. Къадим дарамат чкIидай гьалда авайди яз гьисабзава, къенепатайни, къецелайни адан цларай цIийи сварар атанва.
Авай гьалдиз килигайдалай кьулухъ гьукуматдин векилри медреса цIийи хъувунин месэла веревирдна. А.Амирханова РД-дин медениятдин ирс хуьнин агентстводал, муькуь ведомствойрихъ галаз санал, и месэла, гежел вегьин тавуна, кутугай тегьерда гьялун тапшурмишна. Кьилди къачуртIа, объект республикадин хсусиятдиз элкъуьр хъувун ва республикадин инвестицийрин программадин сергьятра аваз ва я субсидийрин къайдада муниципальный тешкилатдиз пулдин такьатар чара авун теклифна.
Рутул хуьрени А.Амирханов са шумуд объектдиз, гьа жергедай яз ЦСОН-дизни килигна. Ада пешекарривай районда бейкарвилин гьаларикай, яшайишдин икьрардин бинедаллаз игьтияж авай агьалийриз государстводин куьмекар гуникай хабарар кьуна. Ада алай йисан гатфариз селлер атуникди кIвалериз зарар хьайи агьалийрал акьалтзавай четинвилер чирна ва абуруз куьмекар гун тапшурмишна.
Гуьгъуьнлай райадминистрацияда кьиле тухвай совещанидал тестикьарайвал, районда аялрин цIийи бахча ва мектебар эцигда.
«Лезги газет»