10-августдиз Махачкъалада Россиядин Федерациядин Генеральный прокурордин заместитель Андрей Кикотан регьбервилик кваз Кеферпатан Кавказдин ва Кьиблепатан Федеральный округрин къайдаяр хуьдай ва гуьзчивалдай органрин ведомствойрин уртах совещание кьиле фена.
Совещанидин кIвалахда РД-дин Кьилин везифаяр вахтуналди тамамарзавай Сергей Меликова, Кеферпатан Кавказда ва Кьиблепатан Федеральный округра авай РФ-дин Генеральный прокуратурадин Кьилин руководстводи, Кеферпатан Кавказдин федеральный округда авай Россиядин МВД-дин Кьилин Управленидин начальник Сергей Бачурина ва маса ксари иштиракна.
Мярекатдал милли проектар, энергетикадин комплексдиз талукь программаяр кьилиз акъудун патал бюджетдай чара авунвай пулдин такьатар чуьнуьхуниз акси гьерекатриз, энергетикадин комплекс криминалдин таъсирдикай хкудуниз талукь месэлаяр гьялна.
Мярекат ачухдайла, Андрей Кикота къейдна хьи, государство вилик тухун патал милли проектар кьилиз акъудунихъ стратегиядин жигьетдай еке метлеб ава. Абурал гуьзчивал авун прокуратурадин органар патал важиблу кар я.
Ада малумарайвал, алатай йисан сифте кьилерилай милли проектар кьилиз акъудунин хиле 1,5 агъзурдалай гзаф ахтармишунар кьиле тухвана. Нетижада къанун чIурай 5 агъзурдалай гзаф дуьшуьшар винел акъудна ва абурун вилик пад кьуна. Къайдаяр хуьдай органри сад хьана авур кIвалахдин нетижада 245 уголовный дело къарагъарна.
А.Кикота гьакIни къейд авурвал, къайдаяр хуьдай органри чимивилинни энергетикадин комплексдин (ТЭК) хиле авай къанунсуз кIвалахар винел акъудун патал еке кIвалах тухвана. Экономикадин рекьяй уьлкведа гьисабдиз къачунвай гьар вад лагьай тахсиркарвал округда винел акъудна. Энергетикадин идарайрин са жерге руководителри ва къуллугъчийри тахсиркарвилер авунин вилик пад кьуна.
Совещанидал гьакI важиблу маса месэлаярни гьялна. Мисал яз, ТЭК-дин идараяр ресурсралди таъминарзавай карханайриз кредитрин еке такьатар буржлу тирдакай рахана. Ихьтин гьалари энергоресурсар атIунар авачиз датIана гун къурхулувилик кутазва.
Идахъ галаз сад хьиз, мярекатдин иштиракчийри яшайишдинни коммунальный къуллугъра къиметар арадал атунин, ресурсар гьахъ-гьисаб кьун тавуна ишлемишунин месэлаярни веревирдна.
«Лезги газет»
