Июлдин эхиримжи йикъара РД-дин хуьруьн майишатдин ва недай суьрсетдин министр Баттал Батталова Дагъустандин Кьилин везифаяр вахтуналди тамамарзавай Сергей Меликован тапшуругъдалди республикадин хуьруьн майишатдин хиле гьакъисагъвилелди зегьмет чIугвазвай са жерге ксариз лайихлу шабагьар, пишкешар гана.
Абурун жергедай яз, чи ватанэгьли, “РД-дин федеральный аграрный илимдин центр” ФГБНУ-дин илимдин кар алай къуллугъчи, биологиядин илимрин кандидат Шагьмирзоев Руслан Абузаровичазни “Дагъустан Республикадин хуьруьн майишатдин лайихлу деятель” лагьай гьуьрметдин тIвар ганва.
Багъманчивилин ва уьзуьмчивилин хилен алим тир Руслан Шагьмирзоев Сулейман-Стальский райондин Вини СтIалрин хуьре 1956-йисан 16-апрелдиз дидедиз хьана. 18 йисан яшдив агакьайла, ада “Ашагастальский” совхоздин рабочий яз кIвалахиз башламишна.
1979-йисалай къенин йикъалди адан зегьметдин рехъ Дагъустандин НИИСХ-дихъ галаз алакъалу я: лаборант яз кIвалахиз башламишай адакай гзаф йисара набататрин отделдин заведующий хьана. 2000-йисуз Р.Шагьмирзоева биологиядин илимрин кандидатвилин дережа къачун патал диссертация нетижалудаказ хвена.
Институтда къейдзавайвал, Кьиблепатан Дагъустандин дагълух чкайриз мукьва мулкарин накьвадин ери вири патарихъай ахтармишунин, адаз къимет гунин, агроэкологиядин программа кьилиз акъудунин, яни накьвадин къат экологиядин жигьетдай ахтармишунин ва делилар кIватIунин кардик Руслан Абузаровича кутунвай пай екеди я. Са кьадар вахтунда Р.Шагьмирзоев РД-дин экологиядин ва тIебиатдин ресурсрин министерстводин чилерин экологиядин ва инсан къаришмиш хьун себеб яз ери чIур хьанвай чилерин гьал гуьнгуьна хтунин месэлайрай пешекар яз хьана. Идалайни гъейри, 2002-2015-йисара ада РАН-дин ДНЦ-дин биологиядин ресурсрин Прикаспийский институтда чIехи къуллугъчидин, Кьиблепатан Федеральный университетдин филиалда чIехи преподавателвилин везифаярни тамамарна.
Р.Шагьмирзоеван ахтармишунрин нетижаяр хуьруьн майишатдин карханайрин кIвалахда ишлемишзава. Идалайни гъейри, илимдинни производстводин “Емишар ва къелемар” къурулушдин руководитель, Вини СтIалрин госортучастокдин заведующий яз, ада республикада багъманчивилин хел кIвачIел ахкьалдарунин, яни тамамдаказ арадал хкунин программа уьмуьрдиз кечирмишунин кардиз гзаф къуватар серфна.
Малум хьайивал, адан регьбервилик кваз республикадин майишатар гьар йисуз, и ва я маса районрин гьавадин ва накьвадин шартIар фикирда кьуна, битмишарнавай жуьреба-жуьре сортарин 80-100 агъзур къелемдалди таъминарзавай. Ада гьакIни Мегьарамдхуьруьн, Сулейман-Стальский ва Сергокъала районрин майишатар патал 3-4 сеферда виниз тир хийирлувал таъминардай интенсивный жуьредин багълар кутунин инновациядин проектар гьазурнава ва абур саки уьмуьрдиз кечирмишнава.
Руслан Абузаровича кьиле тухвай ахтармишунрин нетижада 50-далай гзаф илимдин кIвалахар чапдиз акъатнава, республикада емишрин багълар кутунин технологияр авайдалай хъсанаруниз талукь 12 теклиф гьазурнава.
Руслан Шагьмирзоеван яргъал йисарин гьакъисагъ зегьмет ва виниз тир пешекарвал РФ-дин ва РД-дин хуьруьн майишатдин министерствойрин, Вирироссиядин В.В.Докучаеван тIварунихъ галай почвоведрин обществодин президиумдин гьуьрметдин грамотайралди къейднава.
КIвалахдин рекьяй юлдашри гьисабзавайвал, Руслан Шагьмирзоеван къилихдиз къастунал кIевивал, жавабдарвал тамамдаказ гьисс авун ва цIийивилерихъ ялун хас я. Чна алимдиз агалкьун тебрикзава, хайи чилин берекатлувал хкажунин рекье мадни виниз тир дережайрив агакьун алхишзава.
Жасмина Саидова
