Алай вахтунда Сулейман-Стальский районди багъманчивиляй Дагъустан Республикада, бязи хилерай Россиядин Федерациядани кIвенкIвечи чкаяр кьазва. Агропромышленный комплекс вилик тухуниз “Полоса” ООО-да “СтIалрин багълар” инвестицийрин проект-миллиардник уьмуьрдиз кечирмишуни еке куьмек гузва. Кар алай проектдин сергьятра аваз ана са куьруь вахтунда 900 гектардилай виниз майданра багълар кутаз алакьна: 260 гектардилай виниз ичин суперинтенсивный (республикада виридалайни чIехи), 20 гектарда хтун ва 30 гектарда хъархъун, 600 гектарда (Россияда виридалайни чIехи) шуьмягърин багълар. Дамахиз жедай и проектдихъ галаз таниш хьун патал райондиз республикадин ва федеральный министерствойрин векилар, газетрин, телевиденийрин, интернет-каналрин журналистар мукьвал-мукьвал къвезва, инвестицийрин проектдин-миллиардникдин кIвенкIвечи тежриба раижзава.
Мукьвара и мураддалди “СтIалрин багълар” инвестмайдандал Дагъустан Республикадин хуьруьн майишатдин ва суьрсетдин министрдин сад лагьай заместитель Шарип Шарипов ва вичин блогеррин дестени галаз “Сельский час” ютуб-каналдин руководитель Игорь Абакумов мугьман хьана.
Райондин кьил Нариман Абдулмуталибовахъ галаз Шарип Шарипов ва Игорь Абакумован десте проект уьмуьрдиз кечирмишзавай производстводин майданрал фена, пешекаррихъ галаз проектдикай, гележегдин планрикай ихтилатар авуна. Агропромышленный карханадин векилри лагьайвал, проектдик сифте кьил кутур ксар авунвай кIвалахрал рази хьана акъваздач. Абурухъ гзаф бегьер гудай ичин сортарин багъларин майданар артухардай фикир ава. Къелемар Бельгиядай ва Италиядай гъида.
“Полоса” ООО-дин проект, кьадардал гьалтайла, чIехиди хьунилай гъейри, ана агротехникадин кIвенкIвечи къайдаярни ишлемишзава. ИкI, дигидай яд кьенят авунин мураддалди дагъдин и участокда стIал-стIал яд гудай къайда кардик кутунва, яд кIватIдай 5 гьавиз эцигнава.
Агрокарханадин пешекарри мугьманриз логистикадин центр тешкилунин ва емишар хуьдай гьамбархана эцигунин планрикайни ихтилатна. И кар патал майдан ва проектдинни сметадин документар гьазурнава.
— “СтIалрин багълар” инвестпроект себеб яз, районди “Хуьрерин мулкар комплекснидаказ вилик тухун” госпрограммада иштиракзава, — къейдна Нариман Абдулмуталибова. — И программадай хуьрера 2 школа, спортдин тадаракар эцигзава, 3 хуьре газдин, Кьасумхуьрел цин линияр тухузва, школадин автобус ва медицинадин мобильный центр къачуна. Проектди 150 кас гьамишан ва 200 кас сезондин кIвалахралди таъминардай мумкинвал гана. Виридалайни кьилинди, проектди чи мулкар яшайишдинни экономикадин жигьетдай вилик тухузва.
Шарип Шарипова райондин кьили лагьай келимайрин ва теклифрин тереф хвена. Москвадай атанвай журналистри агропромышленный карханадин кIвалахриз, мумкинвилериз ва гележегдин планриз еке къимет гана.
— Дагъдин четин къурулушдин шартIара, вични дигидай цин кутугай инфраструктура авачиз, са куьруь вахтунда чIехи майданра инвестицийрин ихьтин проект уьмуьрдиз кечирмишиз алакьуни чун мягьтеларна, — къейдна Игорь Абакумова. — Россиядин хуьруьн майишатдин тежрибада чаз и кар сифте яз аквазва. Гьакъикъатдани, чилин къадир авай, зегьметдал рикI алай инсанар я дагъвияр. Ихьтин зурба проект уьмуьрдиз кечирмишунай райондин кьиле авайбуруз ва “Полоса” ООО-дин пешекарриз чухсагъул, баркалла!
Хазран Кьасумов
