Залан жуьреда тlугъвалдик начагъ ин­санрин кьадар Дербент райондани гзаф жезва. Инин къуллугъчийрик тlугъвалдин инфекциядикди начагъ жезвайбурун кьадар гзаф хьуни къурху кутунва.

И мукьвара хьайи оперативный штабдин заседа­нидал райондин Мугъарты хуьре арадал атанвай чlуру гьалариз килигна, райондин администрацияди, Роспотребнадзордин Дагъустанда авай Управленидин  Дербентдин территориальный отделенидин руководитель Рашид Аджиеван   тек­лифдалди, коронавирусдин инфекция чукlун тавун патал вацран эхирдалди карантин малумарнава. Дербент райондин центральный больницадин кьилин духтур Ра­шид Абдулован гафаралди, Му­гъар­ты хуьре коронавирус квайбур винел акъудун патал  210 касдивай мазок къачуна. Ибурукай 31 касдик азар квайди тайин хьана. 2 кас госпиталдиз ракъурнава, муькуьбур, кlвалера сагъар хъийиз­, духтуррин гуьзчивилик ква.

Тlугъвал башламиш хьайидалай инихъ районда, санлай къачурла, ковид кваз хьунин жигьетдай 2137 кас ахтармишнава. Абурукай и азар квайбур 1070 кас  хьана. Стlалжем хьанвайбурун кьадарни агъзурдалай алатнава. 2080 кас, сагълам хъхьана, гьисабдай акъуднава.

6-июлдилай 15-июлдалди районда  COVID-19 акатнавай 117 кас малум хьанва. Ибурукай 45 кас вирусдикди начагъбур, муькуьбур стlал­жем хьанвайбур я.

Ихьтин муракаб гьалариз килигна, ко­ронавирусдикди начагъ жезвайбур кьабулун патал Республикадин здравоохраненидин министерстводи тади гьалара Дербент райондин Белиж  поселокдин ва Па­дар хуьруьн  участковый больницаяр ко­­вид квайбур кьабулдай провизорный от­деленийриз элкъуьрдай къарар кьабулна.

Рикlел хкин, алатай йисан майдин вацрани  гьа ихьтин гьалар арадал атайла, Белиждинни Падардин клинический больницаяр провизорный госпиталриз элкъуьрнай. Духтуррин галатун тийижир залан зегьметдин ва лазим идарайра кьабулай дуьз серенжемрин нетижада тlугъвалдин вилик пад кьаз хьана.

Ингье гила тlугъвалди вичикай мад ха­бар ганва, и чlуру вирусдикди азарлу жезвайбурун кьадар артух жезва­.

Чун и йикъара Белиждин участокдин больницадихъ галай поликлиникадин заведующий  Селимов  Селим  Къазиевичахъ  галаз гуьруьшмиш хьана, адавай Белижда ачухнавай провизорный отделенида ва поликлиникада ковиддин вилик пад кьун патал тухузвай кlвалах­рикай куьрелди суьгьбет авун тlалабна.

Селим Селимован гафарай малум хьайивал, Республикадин здравоохраненидин министерстводай буйругъ атанмазди, поселокдин больница, Роспотребнадзордин истемишунрив кьадайвал, коронавирус ва стlалжем акатайбур­ кьабулун патал са куьруь вах­­тун­да гьазурна. Санлай къачурла, 50 кас кьабулдай ва сагъар­ хъийидай чкаяр гьазурнава. “Яру”, “къа­цу”­ ва “хъипи” зо­наяр тайи­нарна. Ви­ри шар­тlар яратмишнава: махсус санитариядин зона, душдин кабина, яд чимдай кьве тадарак. Ругуд чкадал азарлуйриз кислород гудай, чи пешекарри гьазурнавай аппаратар ала. ИВЛ-дин аппарат, концентраторар больницада авач. Лагьана кlан­да, министерстводин приказдин бинедаллаз Белиждин больницада тешкилнавай провизорный отделенида анжах кьезил ва юкьван гьалда авай азарлубур кьабулдай шартlар ава. Залан гьалда начагъбур Дербентдиз ва маса ше­гьер­риз ракъурзава. Яни больницада реанимациядин отделение авач. Иниз килигна, залан гьалда начагъбур тади куьмек гудай шар­­тlар авай чкайриз ра­къур­зава. Коронавирусдиз талукь дарманар ава. Тlуьнин патахъайни вири хъсанзава.

Провизорный отделенида дежурст­во тухуз, духтуррикайни медсестрайрикай ибарат пуд бригадади суткада кьиляй-кьи­лиз кlвалахзава. Гьар са бригада 9 кас­дикай ибарат я. Аник 2 духтур, 4 мед­сес­тра ва 3 санитарка ква. Къенин юкъуз абур иниз тади куьмекди гъанвай 45 касдихъ гелкъвезва. Абурун кьадар гагь гзаф жеда,  гагьни — тIимил. Икьван гагьда иниз саки виш кас азарлубур гъанва. Абурукай­ 54 кас сагъар хъувуна. “Къейд ийиз кlан­зава, — лугъузва С.Сели­мова, — коронавирус кваз чи больницадиз гъайи са касдини ковиддиз акси вакцинадин рапар янавачир”.

Селим духтурдин гафарай малум хьайивал, Белиждин больницада коронавирусдиз талукь яз ахъайнавай отде­ле­ни­диз  Дербент шегьердай ва райондин саки чlехи пай хуьрерай, Та­ба­саран, Хив, Мегьарамдхуьруьн, Су­лейман-Стальский, Кьурагь, Ахцегь районрай тади куьмекдин машинра аваз ко­ро­на­вирус акатнавайбур гъанва ва и кар давам жезва.

— Лагьана кlанда, духтурри ихьтин ­чи­ми вахтунда четин шартlара, махсус пар­­талар алаз, чпин буржи чlехи пеше­карви­лелди, намуслувилелди кьилиз акъудзава. Абур алай вахтунда “яру зонада” кlвалахзавай терапевт Бутаева Анжела, хирург Саидов Максим, невролог Ибрагьимов Эмиран, кардиолог Эскендеров Аюб, гинеколог Шабанова Альбина, тера­певт Бабаева Селимат я. Заз инал, виридан зегьмет къейд авуна, абуруз сагърай лугьуз кlанзава, — лагьана С.Селимова.

— Поликлиникада вакцинадин рапар  язавай духтурар тир Маина Селимовади, Алибег Османова ва Жамиля Османовади гьакъисагъвилелди зегьмет чIуг­вазва. Абуру, участокрин терапевтрини  медсестрайри поликлиникадиз атайбурухъ галаз ва гьакl кlвалериз фейи вахтундани коронавирусдиз акси таблигъат­ тухуз, инсанар гъавурда твазва. Вакцинадин раб ягъуналди гьарда вич тlугъ­вал­дикай хуьзвайдакай суьгьбетзава. Коронавирусдиз та­лукь­ яз махсус букле­тарни акъудна, халкь­диз пайнава.

Тlугъвал башламиш хьайидилай инихъ больницадиз 3325 доза вакцина хкана. Икьван гагьда 2900 касдиз сад лагьай паюнин ва 2054 касдиз кьвед ла­гьай паюнин рапар янава. И кlвалах давам жезва. И рекье вилик жергейра муаллимар ва гьакlни школайрин технический персонал, медработникар, поселокдин администрациядин къуллугъчияр ва масабур ава.

* * *

30-июлдиз COVID-19 чукlуниз акси райондин оперативный штабдин заседание хьана. Кьабулнавай серенжемри хъсан нетижа гуниз килигна, Рашид Аджиеван теклифдалди, Мугъарты хуьрел эцигнавай карантин алуднава.

Къагьриман Ибрагьимов