Чуьруькар акъвазнавач
Эрменистандин оборонадин министерстводи Азербайжандин терефди сергьятдал гуьллеяр ахъайнавайдакай малумарна. Идакай “Новости” РИА-ди хабар гузва.
Къейдзавайвал, Азербайжандин яракьлу къуватри нубатдин сеферда гъулгъула туна ва недай-хъвадай суьрсетар тухузвай машиндиз гуьлле гана. ЦIай гунин нетижада улакьдиз бегьем хасаратвал хьана. Агьвалат кьиле фейи чкада алай вахтунда гьалар пайгардик ахкатнава. Азербайжандин подразделенияр мад сеферда Эрменистандин Варденис райондин мулкарал фейидакай 28-июлдиз малум хьанай.
Рапар ядач — кIвалахдивай къерехда
Узбекистандин президент Ш.Мирзиеева коронавирусдиз акси рапар ягъ тавунвай къуллугъчияр кIвалахдивай къерех ийидай ихтияр гузвай къанун акъуднава. Идакай “Podrobno.uz” чешмеди хабар гузва.
Къанундал асаслу яз, Узбекистандин санитариядин кьилин духтурдивай азардин вилик пад кьунин мураддалди агьалийриз чарасуздаказ рапар ягъунин серенжем кьабулиз жеда. И республикада 131 агъзурдалай гзаф инсанрик коронавирус акатнава, кьейибурун кьадар агъзурдав агакьзава.
Кьиникьин хаталувал
США-дин кьушунриз куьмек гайи Афгъанистандин агьалияр кьиникьин хаталувилик акатнава. Идакай “Новости” РИА-дин векилдиз афгъанви таржумачи Исмаил Кхана ихтилатна.
Адан фикирдалди, чIуру гьерекатар кьиле тухузвай “Талибан” тешкилатдин (Россияда къадагъа авунва) боевикри Америкадин аскеррихъ галаз алакъалувилелди кIвалахай агьалийриз регьимлувал къалурдач. “Эгер уьлкведин сагьибвал авун боевикрин ихтиярда гьатайтIа, абуру америкавийриз куьмекар гайи гьар сад рекьида”, — лагьана ада.
Таржумачиди алава хъувурвал, боевикриз арадал атанвай чуьруькар ислягьвилелди пайгардик кухтадай къаст авач. Адан гафаралди, США-дин ва НАТО-дин аскерар боевикрин кIеретIдин къуватар артух хьанвай макъамда Афгъанистандин мулкарай экъечIзава.
Тамар кузва
Якутияда кузвай тамарин майданрин умуми кьадар 4 миллион гектардилай алатнава. Эхиримжи суткада тамун 344 гектар цIу кьуна. Санлай къачурла, республикада 171 цIайлах арадал атанва.
“ТАСС” чешмеди хабар гузвайвал, Россиядин оборонадин министерстводи инженеррин рота ва тамун цIаяр туьхуьрдай махсус техника ракъурнава.
ИчIи рикIелай ишлемиш тийидай суьрсетар
Духтур, пегьризчи А.Белоусовади экуьнахъ ичIи рекIелай тIуьн къадагъа тир няметрин тIварар кьуна. Абурук кофе, хуьрекдин тIям хъсанардай кудай затIар, цитрусар ва газ квай хъвадай затIар акатзава. Пешекардин фикирар “Звезда” каналдин сайтда раижнава.
Ада ихтилатайвал, экуьнахъ ичIи рикIелай хъвайи кофеди иштягь агъузарзава, гьавиляй ам нагьар авурдалай кьулухъ хъун хъсан я. И дуьшуьшда кофеди инсандин бедендиз зарар гудач.
Няметрин тIям хъсанардай жуьреба-жуьре туьнт затIар ичIи рикIелай ишлемишуни хуквадин азарар еримлу авунин хаталувал арадал гъизва. Ихьтин затIар, адет яз, бутерброддик жеда.
Крым рикIяй акъудзавач
Украинадин президент В.Зеленскийди Крымдикай фикирун давам жезва. Адан гафаралди, Крымдикай гуя садрани Россиядин мулк жедач. Адан гафар “Политика Страны” TeIegram-каналди раижнава.
Ада гуя Россиядиз, Украинадиз хьиз, Крым кIан жедач лугьузва.
Украинадин МИД-дин кьил Д.Кулебади гьисабзавайвал, Москвадинни Украинадин алакъаяр къвердавай мадни пис жеда.
Вири ахтармишда
Коронавирусдин тIугъвалди кьил кутур Китайдин Ухань шегьерда алатай йисалай инихъ сифте яз вирус акатнавай пуд дуьшуьш дуьздал акъуднава. Идалайни гъейри, тайин лишанар малум тушиз вирус акатнавайбур ава.
Гьукумдарри, алатай йисуз хьиз, мад сеферда шегьердин вири агьалийрик вирус кватIа ахтармишдайвал я. Алатай йисан майдин вацра и серенжем 19 йикъан къене тамамдиз кьилиз акъуднай.
Яшлуди дустагъда
Германияда 100 йисан яшда авай виликан къаравул дустагъда твадайвал я. Яшлу ватандашдик къанунсуз 3518 кардиз масабурухъ галаз шериквал авунай тахсир кутазва. Идакай “Лента.ру” чешмеда кхьенва.
Кьуьзуьвилизни килиг тавуна, адан сагъламвал суддин вилик жаваб гудай гьалда авайди яз гьисабнава.
«Лезги газет»
