РФ-дин Президент Владимир Путина алай йисан 2-июлдиз акъудай “Аялар авай хизанриз са сеферда гудай пулдин такьатрин гьакъиндай” къарар сифтедай тайинарай муддатдилай кьве гьафтедин фад кьилиз акъудна.
Сифтедай и такьатар 16-августдилай башламишна гудайвал тир, амма гуьгъуьнлай, уьлкведин регьбердин теклифдалди, абур 2-августдиз диде-бубайрив агакьарун кьетIна. ИкI, 17 миллион аялдиз талукь такьатар чи уьлкведа анжах 2-августдиз абурун диде-бубайрив агакьна. Гьа жергедай яз — Дагъустандин хизанривни.
ТIвар кьунвай пулдин куьмекар 6 йисалай 18 йисал кьван яшара авай аялриз талукь я. Мектебрин 9-классар куьтягьна, колледжрик, училищейрик экечIнавай, 18 йисалай артух яшар тамам тахьанвай жегьилризни, сагъламвилин мумкинвилерал сергьят алай, 18-23 йисан яшара авай, чпи умуми образованидин программайрай чирвилер къачун давамарзавай жегьилризни талукь я.
Винидихъ къалурнавай яшара авай гьар са аялдал 10 агъзур манат гьалтзава. Гьакъикъатдани, аялар авай хизанриз авунвай и куьмекди диде-бубайрин гъил кьазва. Исятда мектебдиз гьазур хьун патал хейлин затIар, тадаракар маса къачуна кIан-зава, гьавиляй им диде-бубаяр патал хъсан пишкеш хьанва. Уьлкведин чешмейрин делилралди, са сеферда гузвай такьатар патал санлай 200 млрд манатдилай гзаф пул чара авунва.
Къейд ийин, 10 агъзур манатдин такьатриз талукь арзаяр диде-бубайривай Госкъуллугърин сайтда, Пенсийрин фондуна ва МФЦ-дин идарада вугуз жеда.
«Лезги газет»
