3-августдиз Дагъустандин Кьилин везифаяр вахтуналди тамамарзавай Сергей Меликова коронавирус чукIунин вилик пад кьунин рекьяй республикадин Оперштабдин нубатдин заседание кьиле тухвана.

Санитариядинни тIугъвалдин гьаларин, вирусдиз акси серенжемрин, медицинадин рекьяй агьалийриз ерилу куьмек гунин, ковиддиз акси рапар ягъунин мес­элайрилай гъейри, медидараяр медицинадин кислороддалди ва герек тир маса тадаракралди таъминарунизни кьетIен фикир гана. Эхиримжи варцара COVID-19 акатзавайбурун кьадар республикада артух жезвайвиляй и месэла иллаки важиблу я.

Республикадин регьбер Сергей Меликова, духтуррин делилар фикирда кьуна, къейд авурвал, медицинадин куьмек кIан жезвайбурун кьадар пара жезва: гьар юкъуз­ ­тахминан 200-205 кас ковид акатайбур дуьздал акъатзава. Майдин вацран­ юкьвара гьар юкъуз винел акъудай начагъбурун кьадар 40-50 тир. Дагъустанда гьар юкъуз 450 кас кьван коронавирусдикди ва стIалжемдикди начагъ жезвайбур малум жезва.

Региондин Кьили тIугъвалдихъ галаз женг тухузвай, агьалийриз куьмекар гузвай медкъуллугъчийриз, студентриз-медикриз, волонтерриз чухсагъул малумарна. С.Меликова резервдин чарпайрин кьадар 20 процентдилай тIимил тахьун герек тирди рикIел хкана. И макьсаддалди республикадин аялрин азарханада 50 чарпай кардик кутунва, Махачкъалада авай “РЖД-Медицина” клиникадин азарханада — 40 чарпай.

Къенин юкъуз азарлуйрикай тахминан 1700 кас (начагъбурун умуми кьадардин 30 процент) четин ва лап четин гьалда авайбур я. Нетижада кислороддин игьтияж гзаф жезва. С.Меликова маса регионрай кислород агакьарунин кIвалах гегьен­шарун чарасуз тирди къейдна.

“Республикадин Гьукуматдивай за ме­дицинадин идарайра герек кьадар кислород хьун патал тади гьалара серенжемар кьабулун тIалабзава. Региондин промышленностдинни алишверишдин министерстводин вилик къенин юкъуз эцигнавай кьилин месэла меди­да­ра­яр кислороддалди таъминарун я”, — тагькимарна С.Меликова.

Къейд авурвал, коронавирусдик ре­кьизвай инсанрин кьадарни Дагъустанда гзаф жезва. Кьве йикъан къене 31 кас кьена.  Себебарни ашкарабур я: рапар ягъунин еришар яваш тир, инсанрин гегьенш къатари  тIугъвалдиз акси серенжемрал амал ийизвач.

“Заландиз азарлу хьанвайбурун арада вакцинация авурдалай кьулухъ азарханадин чарпайдал акъатай са касни авач. Къе шегьеррин агьалияр мехъерар авун патал районриз хъфизва. Азарлуйрин кьадар гзаф тахьун патал чна таъсирлудаказ­ тухузвай кIвалахрилай инсанрин уьмуьрар аслу жезва. Виридалайни гзаф къурху кутазвай кар ам я хьи, рекьизвайбурун арада жегьиларни ава”, — лагьана С.Меликова муниципалитетрин регьберриз. Ада кIелунин цIийи йис алукьдалди вакцинация кьиле тухун чарасуз тирди рикIел хкана.

Коронавирусдиз акси рапар ягъунин еришар, республикадин регьбердин гафаралди, эхиримжи йикъара йигин жезва. Июлдиз 100 агъзурдалай гзаф ксари рапар­ янава. Гьа са вахтунда республикадив жуьреба-жуьре  вакцинайрин 297 агъзур доза агакьнава. Республикада тешкилнавай вакцинациядин пунктари алай вахтунда гьар юкъуз 14 агъзур касдиз рапар ядай мумкинвал гузва.

Алатай вацра РД-дин гьукуматдин са­нитариядин кьилин духтурди акъудай къарардал асаслу яз, медицинадин, обра­зо­ванидин, алишверишдин, энергетикадин, СМИ-рин, ЖКХ-дин, жемиятдин улакь­рин ва тIуьнрин хилера кIвалах­за­вайбуру коронавирусдиз акси рапар ягъун чарасузарнава.

Къейд авурвал, ватандашриз рапар ягъуникай кьил къакъуддай ихтиярарни ава, амма и дуьшуьшда абур чпи кьилиз акъудзавай кIвалахривай къерех хьун герек я. Чарасуздаказ рапар ягъунин къарар кьилиз акъудзавай гьаларин патахъай­  С.Меликова гьафтедин къене вичив делилар агакьарун РД-дин Гьукуматдал тапшурмишна.

Ковиддиз акси рапар янавайвилин гьакъиндай шагьидвалзавай къалп документар маса гунихъ галаз алакъалу дели­ларни уьлкведин регионра, гьа жергедай яз Дагъустандани ашкара хьанва. И жигьетдай РД-дин къенепатан крарин мини­стрдин заместитель Д.Гутыряди хабар гайивал, Махачкъала шегьердин са поликлиникадин медкъуллугъчийри пулдин пишкешдихъ 6 касдиз вакцинациядин па­та­­хъай тапан документар гайи делил дуьз­дал акъуднава. С.Меликова ихьтин тахсиркарвилериз рехъ гузвай дуьшуьшрин вилик пад кьун патал къайдаяр хуьдай органриз мумкин тир вири жуьредин серенжемар кьабулуниз эвер гана.

Оперштабдин заседанидикай галай-галайвал “Лезги газетдин” сайтдай кIелиз жеда.

«Лезги газет»