Чи ватанэгьлияр — гьар сана
Уьлкведин кеферпатан меркез яз гьисабзавай Санкт-Петербургдин мулкара фадлай чпин кIвал-югъ кутунвай лезгияр гзаф ава. Абуру чеб жуьреба-жуьре рекьерай къуллугъар кьилиз акъудиз алакьзавай гьакъисагъ зегьметдин сагьибар яз, акьалтзавай несилриз чешнелу векилар яз къалурзава. Алимрилай, духтуррилай, карчийрилай, эцигунардай устIаррилай гъейри, асантди тушир муаллимвилин пешедай кIвалахзавайбурни ава. Заз вичикай ихтилатиз кIанзавай Жонрид Феридович Вагьабовни чIехи шегьерда муаллимвиле кIвалахзавай чи ватанэгьли я.
Жонрид Вагьабов 1982-йисан 5-февралдиз Мегьарамдхуьруьн райондин Советский хуьре муаллимдин хизанда дидедиз хьана.
Инал адан буба Ферид Вагьабовакайни куьруь ихтилат авун кутугнава. Хейлин йисара хуьруьн мектебда аялриз ингилис чIалан тарсар гана, алай вахтунда лайихлу пенсияда ава. Ам “Лезги газет” кIелзавайбуруз фадлай таниш журналист я. Ф.Вагьабова 8 веледдиз тербия гана, шегьредал акъуднава.
Белки, Жонридани вичин бубадилай чешне къачуна, муаллимвилин баркаллу пеше хкяна. Хуьре агалкьунралди юкьван мектеб куьтягьай 1999-йисуз ам информатикадинни ингилис чIалан муаллимдин пешедай ДГПУ-дин физикадинни математикадин факультетдик экечIна.
Вуздани анжах хъсан къиметар аваз кIелай гележегдин хъсан пешекарди кхьей дипломдин кIвалахни тафаватлуди хьана. Эхиримжи курсара кIелай вахтунда ам мектебрин чIехи классра кIелзавайбур патал ингилис чIалай махсус рабочий дафтарар арадал гъунал машгъул хьана. Дипломдин кIвалахни ада и рекьяй кхьена.
ДГПУ-дин физикадинни математикадин факультетдин деканатди алакьунар авай жегьил пешекардиз кIвалахал акъвазун ва кIелунар мадни давамарун теклифнатIани, Жонрид вичин бизнес-проектар кьилиз акъудунин мураддалди Новгород ва Санкт-Петербург шегьерриз фена. Ватандай гъурбатдиз фейи вахтунда сифте нубатда вичин кIвалин ва яшайишдин месэлаяр гьялайдалай кьулухъ ам муаллимвилин кIвалахдив эгечIна. Гуьгъуьнлай ам вич гъавурда акьурвал, муаллимвилин пеше адан тебятдик квай майилвал я.
Жемиятдин крара иштиракиз вердиш хьайи жегьил 2008-йисуз Санкт-Петербургдин Адмиралтейский райондин мергьяматлувилин клубдик волонтер яз экечIна. Гуьгъуьнлай ина 2011-йисалди социальный къуллугъчи яз кIвалахна. 2012-йисуз ам мад муаллимвилин пешеди вичел ялна — махсус коррекционный мектебда ингилис чIаланни информатикадин тарсар га-на, алава яз социальный муаллимдин везифаярни тамамарна.
КIелунин, мадни дерин чирвилер къачунин макьсаддалди Жонрид Вагьабов РФ-дин Президентдин къвалав гвай государстводин къуллугъдин академиядин магистратурадик экечIна ва 2015-йисуз “Развитие социальной работы в субъектах РФ (на примере Санкт-Петербурга)” темадай диссертация хвена.
Хизанриз ва аялриз яшайишдин рекьяй куьмекар гунин центрадин (ЦСПСиД) директордин къуллугъдал тежриба кIватIуналди, социальный кIвалахар хъсанарунин карда вичихъ авай мумкинвилер ахтармишна.
Жемиятдин крарикай ам исятдани къерех хьанвач — Санкт-Петербургдин Московский райондин ТИК-диз куьмекар гузва, сечкийрин участокдин комиссиядин председатель я. Ада Санкт-Петербургда авай лезгийрихъ галазни алакъаяр хуьзва. Жегьил муаллимди хизанда хцизни рушаз тербия гузва.
Государстводин ва муниципальный крар идара авунин магистрдин дережа къачунвай жегьил пешекардиз и рекьяй мадни кIелун давамардай ният ава. Амма нубатдин сеферда ада вичин илимдин кIвалах хайиди тир Мегьарамдхуьруьн райондихъ галаз алакъалу ийида. Гележегда адаз ватандиз хкведай ва хайи ерийра зегьмет чIугвадай къаст ава. Къуй адахъ фикирдик квай вири крар агалкьунралди кьилиз акъуддай мумкинвилер хьурай!
К.Ферзалиев
