Гарпия чинеругрин жуьредик акатзавай вагьши къушарикай сад я. Адаз Кьиблепатан Америкадин гарпия лугьузва. Ихьтин чинеругдин бедендин яргъивал 110 сантиметрдив агакьзава, ахъайнавай луварин яргъивал — 2 метрдив. Заланвал 6-9 килограммдив агакьда. Далудал алай цIакулар мичIи-рехи рангунинбур, вилер чIуп-чIулавбур, кьил экуь-рехи жеда. Кьилел экъечIнавай мичIи рангунин гьяркьуь цIакулри кьил гуьрчегарзава. И йиртижи къушарин тапасар еке къармахар алайбур, залан затIар кьаз жедай къуватлубур я.
Абур анжах Юкьван ва Кьиблепатан Америкадин дуьзенлухрани тропикдин чкайра яшамиш жезва.
ТIуьниз гарпияди гзафни-гзаф ленивецар, гъвечIи маймунар ва вичин тIем акакьдай маса гьайванар ишлемишзава. Бязи вахтара руфун галчIуриз фидай гьайванрални, вагьши къушарални гьужумда.
Бязи чешмейри тестикьарзавайвал, алай вахтунда и къушарин кьадар 50 агъзурдав агакьнава, амма абур йисалай-суз тIимил жезва. Къвердавай тIимил хьунин кьилин себебни тамар терг хьунихъ галаз алакъалу я.
«Лезги газет»
