Дагъустан Республикадин Конституциядин юкъуз РД-дин Кьилин везифаяр вахтуналди тамамарзавай Сергей Меликова республикадин тIвар-ван авай, кIвалахда тафаватлу жезвай ва агалкьунар къазанмишзавай 20-далай виниз дагъустанвийрив Россиядин, Дагъустандин государстводин шабагьар ва РД-дин государстводин, гьакIни Расул Гьамзатован тIварунихъ галай премияр вахкана. Абурун арада образованидин, культурадин, спортдин, медицинадин ва гьакI маса хилера зегьмет чIугвазвай ксар ава.
Сифте нубатда Сергей Меликова кIватI хьанвайбуруз Дагъустандин Конституциядин югъ тебрикна ва лагьана: “27 йис идалай вилик республикадин Дибдин закон кьабулна. Ада дагъустанвийриз чпин тарихдин рехъ хкядай, Россиядин гзаф миллетрикай ибарат халкьдихъ галаз ислягьвилелди, садвилелди яшамиш жедай мумкинвал, азаддаказ кIвалахдай, ял ядай ва маса къени крарал машгъул жедай мумкинвал гана. Тарихдин лап муракаб вахтунда Дагъустанди дуьз рехъ хкяна ва гьа идалди республика вири рекьерай вилик фидай шартIар арадал гъана”.
РД-дин регьберди къейд авурвал, Конституция Дагъларин уьлкведин халкьарин садвилин ва азадвилин ярж я. Ада, алатай виш йисарин адетар хуьналди, дагъвийриз халкьдин майишатдин вири хилерай виликди фидай мумкинвал яратмишзава.
Сергей Меликова республикадин са бязи агьалийрин алакьунрикай ва агалкьунрикай гегьеншдиз суьгьбетна. Ада юлдаш къутармишун патал чандилайни гъил къачур Саид хьтин хва тербияламишай Руслан Абдулгьалимоваз рикIин сидкьидай сагърай лагьана. Адав “Жегьилриз ватанпересвилин тербия гуник пай кутунай” Амет-Хан Султанан тIварунихъ галай медаль вахкана.
Шабагьар медицинадин къуллугъчийривни агакьна. Дербентдин тади куьмекдин духтур Къурбан Абдуризаев “Дагъустан Республикадин лайихлу духтур” тIварцIиз лайихлу хьана. Сербияда кьуршахар кьунай къизилдин медаль къазанмишай Милад Алирзаев “Дагъустан Республикадин физический культура ва спорт вилик тухуник пай кутунай” медалдалди къейдна. “Дагъустан Республикадин яшайишдинни экономикадин хилер вилик тухуник пай кутунай” медалриз РД-дин Гьукуматдин Председателдин заместитель Нуьсрет Омаров, Къизлярдин электромеханический заводдин генеральный директор Ибрагьим Ахматов лайихлу хьана.
Сергей Меликова республикадин культура ва литература вилик тухуник пай кутазвай са бязи юлдашрив премиярни вахкана.
Чи мухбир
