Мукьвара Дербент шегьердин “Нарын-къала” майдандал жаванрин арада “ТЕФИ” фирмадин кубок патал футболдай кьиле фейи вад лагьай международный турнир шад гьалара акьалтIарна. Мярекатда жаван футболистри, тешкилатчийри, акъажунрин судьяйри ва спортдин ветеранри иштиракна.
Вад йикъан къене кьиле фейи футболдин къизгъин акъажунриз гзаф инсанар ашкъидивди тамашна. 1-нумрадин ДЮСШ-дин гзаф йисарин тежриба авай тренер Ибрагьим Султанова вердишарзавай “ТЕФИ” команда агалкьунралди къугъвана. Финалдин паюна “ТЕФИ” командадихъ галаз Хасавюртдин “Победа” команда къугъвана ва 2:1 гьисабдалди дербентвияр гъалиб хьана. И къугъунин судьявал Дагълар Шафиева авуна.
Коммерциядинди тир “ТЕФИ” фирмадин крар идара ийизвай директор Физули Сагуева, фирмадин тIвар алай футболдин командадиз чемпионвилин тIвар мубарак авуналди, адаз шад гьалара къизилдин лишанлу медалар, кубок, сад лагьай дережадин димломар ва махсус савкьатар гана. Кьвед лагьай чка кьур “Победа” командадивни гимишдин лишанлу медалар, кьвед лагьай дережадин димломар вахкана.
Акъажунрин нетижада лап хъсан футболистар, судьяяр ва тешкилатчияр тайинарна. ИкI, рикIел аламукьдай пишкешар “Нефтчи”, “Ангушта” ва “Моздок” командайрив Дербентдин спортдин ветеранри вахкана.
Шегьердин 1-нумрадин ДЮСШ-дин тренерри, ученикри, абурун диде-бубайри ва футболдин гьевескарри международный футболдин турнирдиз къаюмвалзавай “ТЕФИ” ООО-дин регьберар тир Тельман Гьамзаевазни Физули Сагуеваз алхишар авуна.
Тофик Бахрамов
