Гад чуьлдин кIвалахдин лап къиз­гъин вахт я. Сулейман-Стальский районда хуьруьн майишатдин карханаяр, лежбервилинни фермервилин майишатар салан майваяр ва къене цил авай емишар кIватI хъувунал машгъул я.

— Алатай йисуз районда 19350 тонн емишар кIватI хъувунай, цIи 23700 тонндилай тIимил тушиз кIватI хъувун фикирдиз къачунва.  Икьван чIавалди 15000 тонн емишар кIватIнава, — лугьузва райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова.

Къейд авун лазим я хьи, карханайрихъ ва майи­шатрихъ галаз санал районда багъманчивилел хсуси куьмекчи майишатрин иесияр, арендаторарни машгъул я.

Гьамидин Абдулкъафаровахъ галаз санал чун и йикъара Агъа СтIал-Къазмайрал зегьметдин ве­теран Жейранханум Садикьовадин багъдиз фена. Чина берекатдин нур авай и дишегьли шефтелар битмишарунал машгъул жез саки 50 йис я. 20 йис идалай вилик ада 1 гектар чилин участок 49 йисан  муддатда ижарада къачунай, ана вичи гьасилай шефтелрин къелемар цанай.

Чаз акурвал, чешнелу багъда тарарал шефтелрин бегьер булдаказ ала. Шефтелар са шумуд сортунинбур ава. Агакьнавай емишар атIузва ва шегьеррин базарриз агакьарзава. Къацузмай шефтелар са тIимил геж хьиз кIватI хъийида.

— Къе шефтелар атIунал 42 рабочий машгъул я, — лугьузва Ж.Садикьовади. — Гьар са рабочийдиз за йикъа 1200 манат пул гузва. Нянихъ кIвалериз хъфидайла, гьардав са ведрода авай шефтеларни вах­кузва­.

Икьван чIавалди ада арендадин участокдай 16 тонн шефтелар атIанва, мадни 14-15 тонн хъхьун гуьзлемишзава.

Тежрибалу багъманчиди чаз лагьайвал, ада са гектардай гьар йисуз 300-350 центнер шефтелар кIватI хъийизва.

Лагьана кIан­да, Жейранханума гьасилзавай, хъсан акунар авай шефтелрихъ муьштерийрин патай еке игьтияж ава. Шефтелар адавай, Махач­къа­ладай, Дербентдай къвез, муьштерийри маса къачузва.

Ж.Садикьовади чаз лагьайвал, са гектар ижарадин участокдилай гъейри, адахъ сан­лай 1 гектардин майдандиз ­ба­рабар салан мад пуд участокни ава. Анрани шефтелрин багълар ку­тунва.

Ж.Садикьова къелемчивилелни машгъул жезва. Ада 50 сотыхда  къелемлух кутунва. Цилер цуналди, ада гьар йисуз са шумуд агъзур къелем гьасилзава, карханайриз, арендаторриз маса гузва.

Жейранханум Садикьовади багъларай шефтелар кIватIун давамарзава.

Хазран  Кьасумов