Дагъустандин шегьерра яшайишдин объектар эцигун патал чилерин патахъай еке кьитвал ава. И кар себеб яз, республикада цIийи мектебар ва аялрин бахчаяр эцигуниз талукь программаяр уьмуьрдиз кечирмишиз жезвач, гьисабзава РД-дин образованидин ва илимдин министерстводи.
Дагъустандин образованидин ва илимдин министрдин заместитель Али Мегьамедован гафаралди, федеральный центради образованидин идараяр эцигун патал лазим кьадар такьатар чара ийизва. Амма Махачкъалада ва республикадин чIехи маса шегьерра абур эцигдай азад чилер жагъизвач. Кьилди къачуртIа, и кар себеб яз, ада гьисабзавайвал, пуд сменада кIелун арадай акъудунин месэла гьялиз жезвач.
“Къенин юкъуз чи аялри пуд сменада кIелзавай 14 мектеб са программадикни акатзавач. И мукьвара чна РФ-дин просвещенидин министерстводиз гегьенш арза рекье туна ва и мектебрин са пай адак кутуна. Амма муькуь пай, чилихъ галаз алакъалу месэла гьялиз тахьун себеб яз, аник акатнач. Яшайишдин объектар эцигун патал чилерин участокар бес тахьунин месэла Махачкъалада ва Хасавюртда иллаки хцидаказ акъвазнава”, — лагьана А.Мегьамедова.
Ада къейд авурвал, гьа и четинвал аялрин бахчаяр эцигунин месэла гьялдайлани вилик акъваззава. Республикадин властри мукьвал тир йисара мектебдиз фидалди чирвилер гудай тахминан 100 идара эцигун фикирда кьунва, амма чIехи шегьерра и кар патал азад чилер авач.
“Мектебдилай вилик образованидикай менфят къачуз хьунин месэлани Махачкъалада, Дербентда, Хасавюртда, Каспийскда чилер бес тахьунин месэладилай аслу хьанва. Чина абурун еке кьитвал ава. Гьайиф хьи, и кар себеб яз, чавай федеральный центрадай объектар эцигуниз гузвай такьатар серф ийиз, проектар кьилиз акъудиз жезвач”, — малумарна министрдин заместителди.
Къейд ийин, яшайишдин объектар эцигун патал азад чилер тахьунин месэладикай идалай вилик региондин Кьилин везифаяр вахтуналди тамамарзавай Сергей Меликовани малумарнай. Ада и месэлада къайда авачирди, адай кьил акъудун четин тирди, гьакIни регион яшайишдинни экономикадин жигьетдай виликди финин кIвалахдиз инженервилин къурулушар тахьуни манийвалзавайди къейднай.
«Лезги газет»
