Алатай гьафтеда Россиядин  кар алай ритейлеррикай (шей кура-кура маса гудай кархана) сад тир “Магнит” ПАО-ди Дагъустан Республикада сифтегьан кьве туьквен ачухна. И кардиз талукь шад мярекатда Росссиядин Федерациядин промышленностдин ва алишверишдин министр Денис Мантурова ва Дагъустан Республикадин Кьилин везифаяр вахтуналди тамамарзавай Сергей Меликова (онлайн-къайдада), РД-дин Гьукуматдин Председатель Абдулпатагь Амирханова, “Магнит” сетдин президент ва генеральный директор Ян Дюннинга иштиракна.

Республика компанияди вичин туьквенар ачухнавай 67-регион хьана. Сифтегьанбур — “Магнит кIвалин патав” ва “Магнит Косметик” — Каспийск шегьердин цIийи микрорайонда ачухнава. Алай йисан эхирдалди  республикада мад 20 туьквен, мукьвал тир 5 йисуз лагьайтIа,  компаниядиз чи регионда — Махачкъалада, Каспийскда, Дербентда, Избербашда, Да­гъустандин Огни шегьерда  180-дав агакьна алишверишдин чкаяр (“кIва­лин патав” жуьредин 120 ва “Магнит Косметик” жуьредин 60 туьквен) ачухдай фикир ава. 20 туьквен пландин би­недаллаз Махачкъалада ва Каспийскда ачухда. Вад йисан вахтунда республикадин мулкунал  серф ийидай инвестицийрин кьадар 2 миллиард манатдиз барабар жеда. Ина кIва­лахдин 2000 чка тешкилда.

Ян Дюннинга малумарайвал, компаниядиз  республикада кесиб къатарин  агьалияр патал дагълух чкайра “Зи къимет” тIвар ганвай вичин дискаунтеррин — ужуз къиметрин туьквенрин сеть  арадал гъидай фикир ава. Ана агьалийрин арада виридалайни еке игьтияж авай шейэр маса гуда.

Каспийскда ачухнавай “Магнит кIвалин патав”  туьквендин дезгейрал  4000-далай виниз жуьрейрин продуктар ала. Муьштерийриз ина  таза емишар ва майваяр, бакалея (чIахар, тинидин шейэр, чай, кофе), хъвадай шейэр, мижеяр, консервияр ва икI мад теклифнава.

Тайин чка ина Дагъустандин таъминчийри кьунва. Туьквенда республикадин 23 карханади акъудзавай суьрсет маса гузва. Малумарзавайвал, абурун кьадар къвердавай гзаф жеда. “Магнитдин” амадагрин жергеда “Кизляр Урицкий мясокомбинат”,  “Амир-С” ООО-яр, СПоК “Сила Кавказа” ва маса карханаяр ава. Республикада акъудзавай шейэрин къимет алай  чарарал “Дагъустандин суьрсет къачу” га­фар кхьенва, яни муьштерийриз и ва я ма­са шей регионда арадал гъанвайди чир,  амай­бурун арадай ам жагъуриз кьезил жезва.

“Магнит Косметик”  туьквенрин дезгейрилай, ерилу косметикадилай гъейри, бедендихъ гелкъуьн патал лазим шейэр, яша­йишда ишлемишзавай химия, атирар, аялар патал шейэр жагъида.

КьетIендаказ къейд ийин, Дагъустанда компаниядин ихтибарвилин программадикайни менфят къачуз жеда — ина вуч ма­са къачуртIани, адан къиметдин 0,5-2 процентдиз барабар кьадар пул муьштеридин банкунин картадиз элкъвена рахкур хъийи­да. И пул, лугьузвайвал, сетдик акатзавай туьквенрай мад сеферда шей маса къа­чудайла, харж ийиз жеда. Идалайни гъейри, “Магнитда” пенсионерар патал 10 процентдин кьезилвал кардик ква.

РикIел хкин, кура-кура шей маса гудай “Магнит” сетдин ва Дагъустан Республикадин Гьукуматдин арада кIвалаху­нин гьакъиндай икьрардал къулар 2021-йисан 18-мартдиз чIугунай.

Жасмина  Саидова