Меркезда чимивилинни энергетикадин комплексдиз талукь межведомственный рабочий дестедин ва ЖКХ-дин дараматар, идараяр зулунни хъуьтIуьн вахтунда гьазурунин рекьяй республикадин штабдин саналди тир заседание хьана. Ам РД-дин Кьилин везифаяр вахтуналди тамамарзавай Сергей  Меликован регьбервилик кваз кьиле фена.

Мярекатда РД-дин Гьукуматдин Председатель Абдулпатагь Амирханова, ВКС-дин режимдин къайдада РФ-дин энергетикадин министрдин заместитель Павел Сниккарса, Россиядин экономика вилик тухунин министерстводин Кеферпатан Кавказдин Федеральный округдин яшайишдинни экономикадин рекьяй ви­лик­ финин департаментдин директор Игорь Храновскийди,  “Россети” ПАО-дин ге­неральный директордин заместитель Даниил Краинскийди, “Россети Северный Кавказ” компаниядин векилри иштиракна­.

Виликамаз хабар гуналди, региондин Кьили къейд авуна хьи, чимивилинни энергетикадин комплексда ва ЖКХ-дин хиле арадал атанвай гьалар хъсанбур туш. Гьавиляй алукьзавай хъуьтIуьз гила­маз гьазурвилер акуна кIанда ва алатай йи­сарин гъалатIарни фикирда кьун лазим я.

— Гьайиф чIугунивди лугьуз жеда хьи, алатай йисарин тежрибадиз вил вегьейла, чимивал гунин сезон алукьнамазди, республика чимивилелди, электроэнергиядалди, газдалди таъминарунин жигьетдай гьа са жуьредин нукьсанрал расалмиш жезва. Имни энергетикадин объектар, иллаки электросетар, подстанцияр куьгьне хьунихъ галаз (70 процентдилай виниз) алакъалу я. Электроэнергетикадин хейлин объектар ишлемишна кIанзавай вахтарилай алатнава. Республикада маса идарайри, ксари эцигнавай энергетикадин объектарни ава. Абур талукь тир нормайрал асаслу тушиз сетрик кутунва. Ихьтин крари тарашунар, чуьнуьхунар, ийизвай къуллугърай вахтунда пул тагунар арадал гъизва, — лагьана Меликова.

Гьакъикъидаказ, ихьтин гьалар алатай варцара Махачкъалада ва Каспийскда арадал атана.

Сергей Меликова газдин сетрихъ бес кьадарда къуватар авачирдини къейдна. Республикада кардик квай газораспределительный 106 станциядикай 25-да кьадардилай артух гуж алаз кIвалахза­ва. Ида ара-ара хкатунрал, акъвазунрал гъиз­­ва. Бязи вахтара хейлин хуьрера газдин линияр михьиз хкатзава. Идалай гъейри, республикада энергоресурсар ишлемишунай гузвай пуларин кьадарарни тIи­мил жезва. Кар ана ава хьи, чимивилинни­ энергетикадин комплексдин идарайри­ ви­ри тахсирар  агьалийрик кутазва ва жавабдарвални абурун хиве твазва. Амма ина инсанрин тахсир авач. Эгер суткайралди эквер, газ жезвачтIа, абуру пул ву­чиз гудайди хьуй? — лагьана региондин Кьили.

РД-дин энергетикадин ва ЖКХ-дин министр Ризван Мурадова къейд авурвал, ахтармишунар кьиле тухвайла малум хьана хьи, республикада иесисуз 1,3 агъзур километр электрический сетар ва иесисуз 1,8 агъзур трансформаторрин пунктар ава. И объектрин гьа­къиндай алай вахтунда кадастрдин кIва­лахар кьиле тухузва ва абур учетда эцигдайвал я.

Махачкъала шегьердин мэр Салман Дадаева шегьер электроэнергиядалди таъминарунин жигьетдай арадал атанвай гьалариз вичин къимет гана. Шегьердин мулкара авай энергосетрин майи­шат лап куьгьне хьанва. Ада хабар гайи­вал, 15-июндилай 12-июлдалди шегьердин ЕДДС-дин къуллугъчийри агьалийрилай 64 агъзур арза кьабулна. Абурукай 24 агъзур электроэнергия тахьунихъ галаз алакъалу тир.

С.Дадаева лагьайвал, республикадин меркез электроэнергиядалди “Россети Северный Кавказ — “Дагэнергоди” таъминарзава. Гьайиф хьи, и идаради ви­чин хсуси везифаяр тамамвилелди кьи­лиз акъудзавач. Компаниядин идарайра да-тIана аварияр жезва, абур туь­кIуьр хъийидай бригадаяр бес кьадарда желбзавач. Шегьерда гьавадин шартIар са бубат чIур хьанмазди, яшайишдин кIва­­лер, дараматар электроэнергиядикай хкудзава. Анжах эхиримжи вацра еке пуд авария арадал атана. Кьве суткада агъзурралди инсанар экв авачиз амукьна.

РД-дин Кьил С.Меликова меркездин мэрдин тереф хвена ва шегьер тамамвилелди электроэнергиядалди таъминар тийизвай компаниядин гьакъиндай прокуратурадиз арза кхьинин теклиф гана.

Республикадин хуьрериз газдин линияр тухунин гьакъиндай малумат “Газпром газораспределение Дагестан” ООО-дин  директор Ризван Гъазимегьамедова гана. Ада лагьайвал, газификациядин программадик 90 объект эцигун кутунва. Гьа са вахтунда республикадин 24 райондик акатзавай 193 хуьруьз газдин линияр чIугвада. И кар кьилиз акъудайла 41 агъзур кIвал газдалди таъминарда.

Мярекатдал къейд авурвал, региондин Кьили Р.Гъазимегьамедован ихтилатдилай разивал къалурна ва Дагъустанда хуьрер газдалди таъминарунин кIвалах пландин бинедаллаз кьиле физвайди къейдна. Гьа са вахтунда Сергей Меликова  муниципальный тешкилатрин кьилерин рикIел и месэладиз гьар йи­къан­ фикир гана кIанзавайди хкана.

Саналди тир заседанидал РД-дин яшайишдин кIвалерин государственный инспекциядин руководитель Сергей Касьяновни рахана. Ада малумарайвал, ЖКУ-дин жигьетдай агьалийриз ийизвай къуллугърай пул гудай (къачудай) сад тир документ кардик кутадайвал я. Адан кьилин макьсадни гунин, къачунин месэлада ачухвал, михьивал арадал гъун я. 10-августдилай республикада сад тир документ кардик кутада, 10-сентябрдилай Дербент шегьер санлай пул гудай сад тир системадал элячIда.

Заседанидин эхирдай А.Амирханова республикадин ЖКХ-дин да­раматар, идараяр зулунни хъуьтIуьн вахтуниз гьазур жезвай гьалдикай малумат гана.

«Лезги газет»