Чаз малум тир тарихда Ахцегьрин хуьряй акъатнавай кьван машгьур алимрин, духтуррин, художникрин, спортсменрин, шаиррин, медениятдин, жемиятдин, сиясатдин деятелрин ва маса пешекаррин кьадар акьван гзаф я хьи, кIва­тIайтIа, абурукай махсус энциклопедия арадал къведа. Гьеле халкьдин гегьенш къатариз течизвай лайихлу векиларни гзаф ава.

Бажарагълу ахцегьвийрикай сад архитектор-художник, живо­писец  Суслан  Вагьидович  Гьуьсейнов  я. Ада 1991-йисуз Москвадин архитектурадин институт куьтягьна.

РикI алай пеше къачурдалай кьулухъ ада жуьреба-жуьре проектрал кIвалахзава. Адан бажарагъди гуьрчег интерьерар, коттеджрин поселокар, кьилдин кIвалер арадал гъана.

Асул пешедин рекьяй вич архитектор ятIани, ам художниквилин кIвалахдални машгъул я. И жигьет­дай адан яратмишунрин дуьнья жуьреба-жуьреди ва гегьеншди я: адетдин шикилар чIугунилай гъейри, ада интерьер патал гьар жуьре материалрикай гуьрчег затIарни туькIуьрзава. Бажарагълу художникди шуьшедикай, къумадикай, парчайрикай, хамуникай арадал гъизвай ажайиб суьретриз, шикилриз килигуналди тух жедач. Адавай эцигунрин ва маса мате­ри­ал­ри­кайни искусстводин иер затIар туь­кIуьриз жезва.

С.Гьуьсейнован яратмишунар алай вахтунда Мос­­к­ва­дин музейра, чи ва къецепатан уьлквейрин кьилдин кса­рин коллекцийра ава. Ада магьирвилелди, заргарвилелди кIарасдин агъзурралди кIу­са­рикай туькIуьр­на­вай за­тIар иллаки фикир желбдайбур, къиметлубур, художникдин кьетIен алакьунар къалурзавайбур я. Тешпигь авачир архитекторди хьиз, ада интерьеррик вичин гъилералди авунвай, санани авачир жуьредин кье­тIен лишанар кутазва. Гьавиляй ада арадал гъизвай затIар итижлубар ва чан алайбур жезва.

Суслан Гьуьсейнова 2014-йисуз Москвада, РФ-дин Президентдин къвалав гвай Дагъустандин гьамишан векилханада яратмишунрин выставка тешкилна. Бажарагълу ватанэгьлидин яратмишунри килигдайбур вири гьейранарзава. Медениятдин ихьтин мярекатра ада мукьвал-мукьвал иштиракзава.

Къейд ийин, С.Гьуьсейнован кIвалахар Москвада кардик квай художникрин “Кузнецкий мост” кIва­ле, “Манеж” ЦВЗ-да (Центральный выставочный зал), алай аямдин искусстводин “Парк Горького” музейда, Москва шегьердин думада ва меркездин маса майданра раижнава.

К.Къалажухви