Фугу
Шикилдай аквазвайди цацар алай, зегьерлу балугърин жуьредик акатзавай фугу я. Японияда и балугъ кваз гьазурзавай хуьрекдални “фугу” тIвар ала. Бязи чешмейри тестикьарзавайвал, и жуьредин балугърик тетродотоксин лугьудай зегьер ква. ГьакI ятIани, Японияда фугудин як недай лезетлу затIарикай яз гьисабзава.
Лазим тир къайдада гьазур тавунвай фугу тIуьр инсан кьиникьал атунни мумкин я. Недай затI гьазурдайла, и рекьяй пешекарри адак квай зегьердин кьадар тIимиларзава. 1958-йисалай инихъ Японияда фугу гьазурдай ашпазри махсус чирвилер ва лицензия къачун чарасуз яз гьисабзавай къанун кардик ква. Итижлу делилрикай сад ам я хьи, Японияда и балугъдиз памятникни эцигнава.
Са вахтара Японияда, гьакI хейлин маса уьлквейрани фугу тIуьниз ишлемишунал, абур кьунал къадагъа эцигнавай. Фугу квай затIар тIуьникди зегьерламиш жезвай дуьшуьшарни жезва. Са бязи делилралди, Японияда гьар йисуз 10-20 кас фугу тIуьникди рекьизва.
«Лезги газет»
