Чи ветеранар

41 йисуз райондин “ЦIийи дуьнья” газетдин редакцияда секретарь-машинисткавиле зегьмет чIугур  Рагьимат  Гьажибубаевна  Гьажиевади,  яргъал девирда вичин хиве авай везифаяр, тапшурмишай гьар са кIвалах вахтунда ва виниз тир еридивди тамамариз, коллективда, гьакI райондани гьуьрмет, кесерлувал къазанмишна. 

Райондин прессадин ветеран тир Рагьимат ваха 1966-йисалай 2007-йисан эхирдалди вичин уьмуьрдин жегьил йи­сар редакцияда кIвалахуниз бахшна. Редакцияда кIвалахиз хьайи вири йи­сара ам лап вини дережадин инсанвилин къилихралди, юлдашрихъ галаз хуш раф­тарвал авуналди, герек дуьшуьшра абурун куьмекдиз атуналди тафаватлу жезвай. Гьавиляй коллективдини  Рагьимат вахаз екез гьуьрметзавай. И цIарарин авторди зегьметдин ветерандихъ галаз са­ки 30 йисуз газетдин редакцияда санал кIвалахна.

Общественный крарихъ галаз ала­къа­лу серенжемар кьиле тухудайлани, Рагьимат вахан инсанвилин къилихар чаз ачухдиз малум жедай. Вичин яшаризни ки­лиг тавуна, ам кIвалахзавайбу­рун кIвен­кIве жергейра жедай, вичин чешнедалди амай юлдашар кIвалахда ашкъиламишдай.

Зегьметдин ветерандин гзаф йисарин намуслу кIвалах редакциядин руководстводин ва виликан КПСС-дин райкомдин патай са шумуд сеферда къиметлу пишкешар ва гьуьрметдин грамотаяр гуналди къейднава.

— Секретарь-машинисткавал еке къуллугъ тушир, — кIвалахдин йисар ри­кIел хкизва Р.Гьажиевади, — амма кьисметди газетдиз гъунал, гьуьрметлу коллективда, камаллу инсанрин арада 41 йисалай гзаф вахтунда кIвалах авунал­ зун шад я. Сагърай газет, сагърай­ ам гьазурзавайбур ва кIелзавайбур! И девир­да заз вад редактордихъ галаз кIва­лахун кьисмет хьана: К.Азизхановахъ, С.Манатиловахъ, А.Рашидовахъ, Гь.Мур­сало­вахъ ва Н.Мамедовахъ галаз.

— Рагьметлу Касбуба Азизхановакай захъ иллаки чими рикIел хкунар ама, -давамарзава Рагьимат ваха. — Ада неинки масадбурувай, гьакI вичивайни хъсан кIвалах истемишдай. Гьа са вахтунда ада инсанрин дердийрикайни хабар кьадай, абуруз ихтибардай. Гьавиляй къуллугъчиярни адан хатур къачуз чалишмиш жедай. К.Азизхановалай неинки коллективда дуствилин алакъаяр арадал гъиз, гьакI акъудзавай газетдин ерини дибдай хкажиз алакьна.

Редакцияда кIвалахиз хьайи вири и йисара машинкадал материалар, шиирар элягъун патал зи патав гзаф инсанар, кьилди къачуртIа, Ашукь Абдурагьман, писатель Къияс Межидов, шаир Хкем Жа­малдин, театр патал сегьнеяр кхьизвай Омар Нуьгьов ва масабур къведай. Паталай атанвай инсанрин мате­риа­­лар элягъун зи везифайрик акатза­ва­чир­тIани, за садан хатурни ханач ва са­да­вайни жу-ва тамамарай кIвалахдай пул къачунач. Виликрай инсанар михьи тир.

Хайи стха Абдулрашид газетдин редактор ва уьмуьрдин юлдаш Заур Гьажиев бажарагълу журналист ва редакциядин экономикадин отделдин заведующий тиртIани (рагьмет хьурай чпиз), Рагьимат ваха вич акьалтIай селигъалувилелди тухудай: ада кIвалахал геж авур, са гьихьтин ятIани багьнадалди татай, къе гъиляй физвай кар пакадал вегьей дуьшуьш заз чидач. З.Гьажиеван яратмишунрин агалкьунрик Рагьимат вахан пайни квайди сир тушир.

2007-йисан январдилай пенсиядиз экъечIнавай Р.Гьажиевади алай вахтунда ял язава.

И мукьвара райондин прессадин ветеран Рагьимат Гьажибубаевна Гьажиевади 80 йисан юбилей къейдна. Чна адаз и лишанлу вакъиа рикIин сидкьидай мубаракзава. Къуй ветерандихъ сагъламвал хьурай!

Нариман  Мамедов